Այսօր Մամուլի ազգային ակումբը և ԱՄՆ Ազգային ժողովրդավարական ինստիտուտը (NDI) կազմակերպել էին քննարկում «Քաղաքական երկխոսության կայացման նպատակը, խնդիրները, խոչընդոտները Հայաստանում» թեմայով:
ՀՀ ԱԺ ՀՀԿ խմբակցության անդամ Արայիկ Հովհաննիսյանը իշխանության ներսում երկխոսություն սկսելու տեսակետից կարևոր է համարում կոալիցիոն հուշագրի ստորագրումը, իսկ ընդդիմության հետ երկխոսություն սկսելու համար` Հանրային խորհրդի ստեղծումը և Երևանի քաղաքապետարանում տարբեր ուժերի համագործակցությունը:
Բանավեճի իշխանական մյուս ներկայացուցիչ Նարիա Զոհրաբյանը նշեց, որ «Բարգավաճ Հայաստան» կուսակցությունը ողջունում է իշխանության և ընդդիմության միջև «սուր անկյունների» հարթեցումը, եթե ադա իմիտացիոն բնույթ չի կրում:
ՀՅԴ ԱԺ պատգամավոր Ռուզան Առաքելյանը ևս ողջունում է քաղաքական երկխոսությունը, եթե այն ուղղված է երկրի զարգացմանը: Առաքելյանը կարծում է, որ մենք հատկապես թերացել ենք հասարակության հետ քաղաքական երկխոսության հարցում, քանի որ ինքը միտինգները և հավաքները չի համարում այդպիսի երկխոսության դրսևորումներ: «Դաշնակցության կարծիքով, պետք է երկխոսությունը չվնասի ժողովրդին: Նպատակը չի արդարացնում միջոցները: Համագործակցության նպատակը միշտ էլ ազնիվ է, սակայն միջոցները հաճախ լինում են ոչ կառուցողական»,- ասում է Ռուզան Առաքելյանը:
«Ժառանգության» պատգամավոր Արմեն Մարտիրոսյանի խոսքով, իշխանության և ընդդիմության միջև երկխոսություն լինել չի կարող, քանի որ ընդդիմությունը չի մասնակցում որոշումների կայացմանը:
ԺԿ նախագահ Տիգրան Կարապետյանի գնահատմամբ` քաղաքական երկխոսությունը կախված է Սերժ Սարգսյանի «բարի կամքից»:
ՀՌԱԿ ատենապետ Էդվարդ Անտինյանը զեկույցում ասաց, որ իր կուսակցությունը դեռ 3 տարի առաջ է խորհուրդ տվել գնալ ընդդիմության և իշխանության այն համագործակցությանը, որի մասին այժմ խոսում են բոլորը:
