ՀՀԿ-ն կետ առ կետ քննարկում է սահմանադրական փոփոխությունների նախագիծը և ունի արդեն մոտ 300 առաջարկություն: Այս մասին տեղեկությունը, որ հրապարակվել է ՀՀԿ-ի և սահմանադրական փոփոխությունների աշխատանքային մասնագիտական խմբի հանդիպումների վերաբերյալ, ըստ էության ծիծաղ է առաջացնում առաջին հայացքից:
ՀՀԿ-ն կամ նրա կուսակցապետը սահմանադրական փոփոխությունների նախաձեռնողներն են, այսպես ասած, գործընթացի պատասխանատուները, և թվում է, որ նրանց ներկայացրած նախագծի վերաբերյալ քննարկումներ ու առաջարկություններ պետք է անեն այլ ուժեր: Սակայն իրականում այս ձևական թվացող գործընթացն իր խորքում ունի բավական իրատեսական շերտեր: Բանն այն է, որ ՀՀԿ-ն և Սերժ Սարգսյանը, ըստ էության, տարբեր սուբյեկտներ են, չնայած համատեղ կյանքին և բացարձակ իշխանությանը: Խնդիրն այն է, որ ՀՀԿ-ում ռեալ մտավախություններ կան սահմանադրական թակարդի վերաբերյալ, նույնքան, ինչքան օրինակ այլ կուսակցություններում, և գուցե նույնիսկ ավելի: Քանի որ ՀՀԿ-ն ամենաշատ կորցնելու բանն ունի այս առումով:
Միաժամանակ, Հանրապետական կուսակցության տարբեր խմբերն ու թևերը անկասկած համոզված են, հստակ գիտակցում են, որ ամենահարմար բալաստն են Սերժ Սարգսյանի համար, և Սարգսյանը ոչ մի բանից չի կարող ավելի շահավետ հրաժարվել, թեկուզ կամաց-կամաց կամ մաս առ մաս զոհաբերելով, ինչքան ՀՀԿ-ից: Եվ հանրապետականները, անկասկած, քաջ գիտակցում են, որ Սերժ Սարգսյանը ինչ-որ պահի անխուսափելիորեն զոհաբերելու է ՀՀԿ-ն՝ առնվազն իր ներկայիս բովանդակությամբ:
Սա չի նշանակում, որ զոհաբերելու է ավելի լավ բովանդակության համար: Ավելի շուտ զոհաբերելու է ավելի լավ ձևի համար, սակայն զոհաբերելու փաստը գրեթե անշրջանցելի է թվում անգամ տեսանելի ապագայի համար: Ըստ էության, արդեն իսկ մենք տեսնում ենք նմանօրինակ գործընթաց, օրինակ, ի դեմս Աշոտ Աղաբաբյանի սնանկացման, որը թվում է, թե ՀՀԿ-ի առանցքային գործիչներից ու կլանի ներկայացուցիչներից է, ԱԺ նախագահ, ՀՀԿ աքսակալ Գալուստ Սահակյանի բարեկամը: Եվ սրան գումարվում է, անկասկած, Դաշնակցության դերակատարման աճը, որը մեծ կասկածներ է առաջացնում ՀՀԿ-ականների շրջանակում այն կապակցությամբ, որ Սերժ Սարգսյանը ինչ-ինչ պայմանավորվածություններ ունի ՀՅԴ-ի հետ, և սահմանադրական փոփոխությունների արդյունքում ՀՀԿ-ն կարող է հայտնվել այդ պայմանավորվածությունների թիրախում:
Ահա այս ամենը ՀՀԿ-ական տարբեր խմբերին ըստ էության միավորում է մեկ բանի՝ Սահմանադրության նախագիծը մանրադիտակի տակ ուսումնասիրելու առանցքի շուրջ, և ներկայիս քննարկումները ամենևին զուտ ձևականություն չեն, այլ արտացոլում են իշխանական համակարգում առկա փոխադարձ անվստահության էական ծավալների մասին:
