«Ուրեմն իրականում ինչքան վատ է վիճակը, որ ստիպված են եղել գոնե զրոյական աճ ցույց տալ»,- «Առաջին լրատվականի» հետ զրույցում այսօր ասաց ՀՀ նախկին վարչապետ Հրանտ Բագրատյանը` խոսելով երեկ ԱՎԾ-ի հրապարակած հիմնական մակրոտնտեսական ցուցանիշների մասին: Հիշեցնենք, որ ըստ այդ ցուցանիշների` 2011թ. մարտին գյուղատնտեսությունը, շինարարությունը և ծառայությունները անկում էին ապրել, իսկ տնտեսական ակտիվության ցուցանիշը (ՏԱՑ) 0%-ով էր աճել: «Արժույթի միջազգային հիմնադրամը հրապարակել է առաջին եռամսյակի տվյալները, աշխարհում աճը միջինում 5% է կազմել»,- ասաց Հ. Բագրատյանը:
Նշենք նաև, որ հունվարի նախապես հայտարարված 7.7% ՏԱՑ-ը էականորեն վերանայվել էր և դարձվել 3.9%: «2010թ. ՀՆԱ-ի աճը ևս վերանայել էին` 2.6%-ը դարձնելով 2.1%: Այս վերանայումները կարող են վկայել նաև մանիպուլյացիաների մասին: Իրենք երկու ճանապարհ ունեն աճ ցույց տալու`կամ իսկապես աճ լինում է, ցույց են տալիս, կամ էլ նախորդ տարվա թվերն են փոքրացնում, բազան են փոքրացնում, որ դրա հիմքի վրա աճ երևա»,- ասաց Հ. Բագրատյանը:
