«Բարգավաճ Հայաստան» խմբակցութան պատգամավոր Վարդան Օսկանյանը այսօր ԱԺ-ում տեղի ունեցած բրիֆինգի ժամանակ հայտարարեց, որ Երևանի ավագանու ընտրություններին մասնակցելու համար ոչ իշխանական ուժերը մասնակցության երկու տարբերակ են քննարկել՝ ընտրություններին մասնակցել դաշինքով և առանձին՝ այս դեպքում համագործակցելով Երևանի ավագանու կազմում:
Նա ավելացրեց, թե քննարկումների ընթացքում ընտրվել է երկրորդ տարբերակը: Վ. Օսկանյանը միաժամանակ նաև հայտարարեց, թե ԲՀԿ-ն պատրաստվում է այդ ընտրություններին հաղթել և լուծել երևանցիների կենցաղային խնդիրները, վերականգնել մայրաքաղաքի աղճատված դեմքը և վերացնել քաղաքապետարանում ու թաղապետարաններում գոյություն ունեցող բյուրոկրատական քաշքշուկը: Վ. Օսկանյանը նաև հայտարարեց, որ ինքը պատրաստ է Երևանի քաղաքապետ աշխատել:
Իսկ ԲՀԿ խմբակցության քարտուղար Նաիրա Զոհրաբյանը քաղաքական ամբարտավանություն համարեց ՀՀԿ-ի այն հայտարարությունները, թե ԲՀԿ-ն ու մյուս ուժերը պայքարում են երկրորդ տեղի համար, և որ իրենք Երևանը չեն հանձնի: Երևանը որևէ քաղաքական ուժի կամ մի խումբ մարդկանց գրպանում չէ, որ նրանք որոշեն գրպանից հանել և տալ մեկ այլ ուժի… «Դրա պատասխանը տրվել է Գյումրիում, կտրվի նաև Երևանում: Կարող եք չկասկածել»,- հայտարարեց Ն.Զոհրաբյանը:
Հիշեցնենք, որ նախագահական ընտրություններին Սերժ Սարգսյանը Գյումրիում պարտվել էր:
ԲՀԿ պատգամավորները չէին կարող չխոսել ավանդաբար իրենց սիրելի թեմայից՝ վարչապետի ու կառավարության փոփոխությունից: Այդ մասին նախ խոսեց Վ. Օսկանյանը՝ ասելով, թե մեր երկրի քաղաքացիների դժգոհության նկատմամբ իշխանությունների վերաբերմունքը կերևա առաջիկայում նոր կառավարության ձևավորման դեպքում:
Հայտնի է, որ ԲՀԿ-ն աչք ունի վարչապետի պաշտոնի վրա, և այդ նպատակով ցանկանում է, որ վարչապետ Տիգրան Սարգսյանը հրաժարական տա: Պարզապես ԲՀԿ-ն չի համարձակվում իր այդ պահանջը ուղղակիորեն հնչեցնել: Փոխարենը քննադատում է կառավարության սոցիալ-տնտեսական քաղաքականությունը:
Ինչո՞ւ ԲՀԿ-ն, ինչպես Դաշնակցություն կուսակցությունը, նման անվստահություն չի հայտնում կառավարությանը: Ն. Զոհրաբյանի խոսքով՝ անիմաստ է, քանի որ դրա համար անհրաժեշտ 66 ձայները չեն կարողանա ապահովել: Այդ դեպքում Ս. Սարգսյանից ինչո՞ւ հրապարակավ չեն պահանջում Տ. Սարգսյանի հրաժարականը: Կամ՝ Հայաստանում գոյություն ունեցող իրավիճակի համար ինչո՞ւ չեն քննադատում նաև Ս. Սարգսյանին. չէ՞ որ մեր երկրում նախագահն է կայացնում գլոբալ որոշումները: Ն. Զոհրաբյանն այս հարցերին չպատասխանեց:
Ի դեպ, Վ. Օսկանյանին հարց ուղղվեց, թե ինչպես է գնահատում անցած նախագահական ընտրությունները, արդյոք Ս. Սարգսյանը լեգիտի՞մ նախագահ է: Վ. Օսկանյաը նույնպես չցանկացավ ուղղակի պատասխան տալ և ասաց, թե «չի ուզենա գնահատական տալ»: «Մի բան ակնհայտ է՝ ընտրություններն անցել են լուրջ, համատարած խախտումներով: Եվ իմ դիրքորոշումը նույնն է՝ անքան ժամանակ, քանի դեռ իշխանությունները չեն կարող ազատ, արդար ընտրություններ իրականացնել, նրանք մեղավոր են այդ հարցում: Այնքան ժամանակ, քանի դեռ կան խախտումներ, ժողովուրդն իրավունք ունի կասկածել խախտումների մեջ:
Այո, ես կասկածում եմ խախտումների մեջ, որովհետև դրանք եղել են: Եվ այդ խախտումների պատասխանատուն իշխանություններն են: Այսօր ժողովրդի մոտ կա հստակ ձևակերպում՝ փոփոխություն՝ և՛ անձերի, և՛ քաղաքականության: Իշխանությունները ականջալուր կլինե՞ն այդ պահանջին, թե՞ ոչ՝ այս պահին, դժբախտավար, ես դա չեմ տեսնում: Կառավարության կազմից շուտով կհամոզվենք դրանում»,- եզրափակեց Վ. Օսկանյանը:
