«Ժառանգություն» խմբակցության ղեկավար Ռուբիկ Հակոբյանը այսօր լրագրողների հետ ճեպազրույցի ժամանակ հայտարարեց, որ նախագահ Սերժ Սարգսյանի ասուլիսի ամենավիրավորական պահը Րաֆֆի Հովհաննիսյանի կողմից մերժված առաջարկության հրապարակումն էր, ինչը դիվանագիտական առումով մեծագույն վիրավորանք էր դիմացինի նկատմամբ:
Րաֆֆի Հովհաննիսյանի կողմից այդ առաջարկությունների մերժումը փակ ծրարով նորից ետ է ուղարկվել:
Ռուբիկ Հակոբյանը նշեց, որ այդ առաջարկությունների մերժումը ինքն է տարել նախագահական:
Լրագրողների հարցին՝ արդյոք Հայաստանում հնարավո՞ր է սահմանադրական ճանապարհով իշխանափոխության հասնել, Ռ. Հակոբյանը պատասխանեց, թե քաղաքակիրթ երկրներում հնարավոր է, բայց Հայաստանում դա չի հաջողվել:
«Նախորդ նախագահական ընտրություններին ընդդիմադիր բոլոր թեկնածուները հաղթել են, իսկ նախագահները՝ պարտվել, սակայն դա հնարավոր չի եղել ամրագրել դե յուրե: Մենք պետք է փորձենք այդ հաղթանակը դե յուրե ամրագրել»,- ասաց Ռուբիկ Հակոբյանը:
Իսկ արդյոք Երևանի ավագանու ընտրություններին հնարավո՞ր է, որ ընդդիմադիր կուսակցությունները կոալիցիա կազմեն: Ռուբիկ Հակոբյանը չբացառեց՝ հավելելով, որ դա հնարավոր կլինի, եթե բոլոր ուժերը ազնիվ նախընտրական քարոզչություն իրականացնեն, և չկրկնվի խորհրդարանական ընտրությունների պատմությունը: Հավանաբար, նա նկատի ուներ ԲՀԿ-ին, որը խորհրդարանական ընտրությունների ժամանակ ընտրակաշառք բաժանեց:
Իսկ հնարավո՞ր է, որ այս ընտրություններից հետո ԲՀԿ-ի շուրջ առանցքը ձևավորվի՝ հարցին Ռուբիկ Հակոբյանը պատասխանեց. «Եթե ինչ-որ ուժ ցանկանում էր իր առանցքի շուրջ համախմբում իրականացնել, առնվազն այդ մասին չպետք է հայտարարեր»:
Լուսանկարը՝ PanARMENIAN Photo-ի
