Ճանապարհային ոստիկանության ճանապարհապարեկային ծառայության բաժնի պետ Նորիկ Սարգսյանը սեպտեմբերի 1-ից առաջ վարորդներին հերթական անգամ սթափության կոչ է անում, իսկ ծնողներին՝ զգուշավորության:
Նա հայտարարեց, որ նոր ուսումնական տարվա մեկնարկին բոլոր դպրոցների, կրթահամալիրների մոտ ուժեղացված հսկողություն կսահմանվի, դպրոցներում կլինեն անչափահասների գծով տեսուչներ, և այդ ուժեղացված հսկողությունը կշարունակվի 1 ամիս:
Ոստիկանությունը սեպտեմբերի 1-ին անվտանգ երթևեկության մեկամսյակ է հայտարարելու:
«Բոլորիս ջանքերով պետք է հասնենք արդյունքի, ինչի համար կոչ եմ անում մանկավարժներին՝ առաջին իսկ օրից սովորեցնել երթևեկության կանոնները, նույնիսկ առաջին դասարանցիների մեջ պետք է սերմանել ճանապարհային երթևեկության կանոնները պահպանելու կարևորությունը, վարորդներին էլ կոչ եմ անում մեքենաները վարել սթափ վիճակում և լինել ավելի ուշադիր»,- ասաց Սարգսյանը:
Երևանի քաղաքապետարանի տրանսպորտի վարչության պետ Հենրիկ Նավասարդյանն իր հերթին նշեց, որ քաղաքապետարանը լրացուցիչ միջոցներ է ձեռնարկել, որպեսզի ապահովվի երեխաների ապահով տեղափոխումը դպրոց և հակառակ ուղղությամբ: Մասնավորապես, ավելացվել է ավտոբուսների, երթուղային տաքսիների և տրոլեյբուսների թիվը: Բացի դրանից՝ տրանսպորտը բերվել է անհրաժեշտ սանիտարական մակարդակի:
