News Georgia լրատվական գործակալության փոխանցմամբ՝ Վրաստանի երրորդ նախագահ, ներկայումս Օդեսայի նահանգապետ Միխեիլ Սաակաշվիլին «Վրացական երազանք» իշխող դաշինքի հիմնադիր Բիձինա Իվանիշվիլուն մեղադրել է Բաթումում գտնվող «Ալի և Նինո» շարժական քանդակը ոչնչացնելու համար։
Սաակաշվիլին Facebook-ի իր էջում գրել է. «Այսօր Բաթումում ռուսաստանյան օլիգարխ Իվանիշվիլու հրահանգով ավերվել է «Ալի և Նինո» շարժական արձանը»։ Բաթումի այդ հանրահայտ քանդակը վնասվել է օգոստոսի 26-ին ապամոնտաժելու ժամանակ։
Բաթումի քաղաքային իշխանությունները որոշել են քանդակը տեղափոխել մի քանի տասնյակ մետր հեռավորության վրա, սակայն ապամոնտաժման ժամանակ ճոպանը կտրվել է, և արձաններից մեկը վնասվել է։ Քաղաքային իշխանությունները պնդում են, որ վնասը վերականգնելի է։
Քանդակը Բաթումի բուլվարում տեղադրվել է 2011 թվականի ամռանը՝ Սաակաշվիլու նախագահության ժամանակ։ Տղամարդու և կնոջ երկու վիթխարի ֆիգուրները՝ Ալին և Նինոն, որոնք տարբեր ազգությունների ու տարբեր հավատքի կրողներ են, սիրում են միմյանց։
Յուրաքանչյուր երեկո 7-մետրանոց արձանները շարժվում են միմյանց ընդառաջ՝ յուրաքանչյուր 10 րոպեն մեկ փոխելով իրենց դիրքը, մինչև որ հանդիպեն միմյանց և դառնան մեկ ամբողջություն։ Դրանից հետո սկսվում է հակառակ գործընթացը, իսկ հետո ամեն ինչ սկսվում է նորից։
Այժմ հաղորդվում է, որ քանդակն իր նոր վայրում կտեղադրվի սեպտեմբերի 5-ին։ Վրացի քանդակագործին քանդակի ստեղծման հարցում ոգեշնչել է Կուրբան Սաիդի գիրքը, որում պատմվում է ադրբեջանցի պատանու ու վրացի աղջկա սիրո մասին։
