Քիչ առաջ ավարտվեց ՀՀԿ գործադիր մարմնի նիստը: Կուսակցության մամլո խոսնակ Էդուարդ Շարմազանովը լրագրողներին տեղեկացրեց, որ նիստը վարել է կուսակցության նախագահ ՍերԺ Սարգսյանը. քննարկվել են ներքաղաքական զարգացումները, նաև՝ Երևանի ավագանու ընտրություններին վերաբերող հարցեր. «Շատ իրատեսական և սպասված եմ համարում այն փաստը, որ ընդդիմադիր ուժերը չհամախմբվեցին, որովհետև Երևանի ավագանու ընտրություններում կլինի պայքար ոչ այնքան առաջին տեղի, որքան երկրորդ տեղի համար՝ հակաիշխանական դաշտում: Եթե հիշում եք նախագահական ընտրություններից առաջ իրեն քաղաքական այլընտրանք հռչակած ուժը խորը քաղաքական քնի մեջ էր, արթնանալու փորձեր կատարեց և հայտարարեց, որ իրենց առանցքի շուրջ պետք է միավորվեն, իսկ պարոն Րաֆֆի Հովհաննիսյանը կարծում է՝ ինքն է ժողովրդի թեկնածուն։ Այդ իմաստով, ես կարծում եմ, հակաիշխանական դաշտում լուրջ պայքար է ընթանալու:
Մենք հարգանքով ենք վերաբերվում բոլոր ցուցակներին, քաղաքական թիմերին, ովքեր հայտ են ներկայացրել ԿԸՀ՝ մասնակցելու մայիսյան ընտրություններին։Մենք գտնում ենք որ համախմբված աշխատանքի դեպքում մենք ունենք բոլոր շանսերը առաջինը լինելու համար»,- ասաց նա:
Էդուարդ Շարմազանովն անդրադարձավ նաև ԲՀԿ մամլո խոսնակ, ԱԺ նույն խմբակցության պատգամավոր Տիգրան Ուրիխանյանի այն հայտարարությանը, թե վարչապետը պետք է գնա ոստիկանության մոտակա բաժին և ցուցմունք տա։ «Ես ինչքան տեղյակ եմ, մեր կուսակցության ներկայացուցիչները պատասխան տվել են պլինտուսից ցածր մակարդակ ունեցող այդ ասածին, որը կոռեկտ չէ, և կարծում եմ, որ յուրաքանչյուրը պետք է վերմակը իր մարմնով մեկ մեկնի: Չափի սահմանը գեղեցկացնում է մարդուն։ Հաճախակի կուռքեր փոխող նորաթուխ պառլամենտականին կխնդրեի և կհորդորեի, որ ընտրությունները անցնելու են, բայց մարդ պետք է այնպես անի, որ չամաչի։ Իսկ եթե գողեր ու ավազակներ է փնտրում, ապա դրանց թող իր շրջապատում նայի՝ ավելի ցայտուն կերևա»,- ասաց Է. Շարմազանովը։
