Թուրքական Dünya Bülteni լրատվական կենտրոնի փոխանցմամբ՝ «Ազգայնական շարժում» կուսակցության (ԱՇԿ) առաջնորդ Դևլեթ Բահչելին կուսակցության կենտրոնական գրասենյակում կազմակերպված մամուլի ասուլիսի ժամանակ Թուրքիայի նախագահ Ռեջեփ Էրդողանին մեղադրել է կոալիցիոն կառավարության ձևավորմանը խոչընդոտելու համար։
Բահչելիի խոսքով՝ անհրաժեշտ է իմանալ, որ հենց Էրդողանն է խոչընդոտել կոալիցիոն կառավարության ձևավորմանը և ցանկացել է արտահերթ խորհրդարանական ընտրություններ, ինչի համար էլ հենց նա է ստեղծված իրավիճակի պատասխանատուն։ Բահչելին հիշեցրել է, որ կոալիցիոն կառավարության ձևավորման վերջնաժամկետից 6 օր առաջ արդեն իսկ դադարեցվել են տվյալ ուղղությամբ աշխատանքները, և որ Դավութօղլուն ԺՀԿ-ին անգամ չի էլ առաջարկել ձևավորել կոալիցիա։
Խոսելով վերջին շրջանում Թուրքիայում PKK-ի հետ վերսկսված բախումների մասին՝ Բահչելին հայտարարել է. «Ահաբեկչությունը վերստին գլուխ է բարձրացրել։ Մենք կորցրել ենք մեր 62 քաղաքացիների, որոնք զինծառայողներ, ոստիկաններ ու գյուղական պահապաններ էին։ Սուրուչի սպանդի ժամանակ զոհվեց 32 մարդ։ Թուրքիայում տիրում է քաոսային իրավիճակ։ Մերձավոր Արևելքի կրակը հասել է մեր հայրենի հողերին»։
