Ադրբեջանական 1News.az կայքի փոխանցմամբ, Ադրբեջանի Միլի մեջլիսի (խորհրդարան) պատգամավոր, քաղաքագետ Ռասիմ Մուսաբեկովն անդրադարձ է կատարել վրացական խորհրդարանի կողմից ռազմական տարանցման մասին ռուս-վրացական համաձայնագրի չեղյալ հայտարարմանը.
«Այդ պայմանագրի չեղյալ հայտարարումը դրական գործոն է հանդիսանում ողջ տարածաշրջանի համար: Միևնույն ժամանակ, պետք է նշել, որ գործնականում այդ պայմանագիրը 2008 թվականից սկսած չէր գործում և փաստացի կորցրել էր իր իմաստը:
Այժմ ռուսական կողմը ստիպված է այլընտրանքային ուղիներ փնտրել` Հայաստանում գտնվող իր բազան ապահովելու համար:
Սակայն հաշվի առնելով Հայաստանի հարաբերությունները Թուրքիայի ու Ադրբեջանի հետ, միանգամից այս երկու տարանցիկ տարբերակներն ի չիք են դառնում:
Մնում է միայն իրանական տարբերակը, այսինքն` Ռուսաստանից ռազմական բեռները Հայաստան պետք է հասցվեն Կասպիցի ու Միջին Ասիայի միջոցով: Սակայն դա հիպոթետիկ տարբերակ է, քանի որ այդ երթուղին այնքան թանկարժեք է, որ չեմ կարծում, թե ռուսական կողմը լրջորեն դիտարկում է այդ տարբերակը:
Որոշակի առումով վրացական խորհրդարանի այդ որոշումն ամրապնդում է նաև Ադրբեջանի դիրքերը: Այսինքն` Հայաստանի հույսերը «մշուշոտ» են, ինչի համար էլ Ադրբեջանը բանակցային գործընթացում ձեռք է բերում ևս մեկ հաղթաթուղթ:
Պետք է ուշադրություն դարձնել այն հանգամանքին, որ ռազմական տարանցման պայմանագրի չեղյալ հայտարարումից առաջ Հայաստան ժամանեց Վրաստանի պաշտպանության նախարարը: Ամենայն հավանականությամբ, վրացական կողմն ինչ-որ կերպ հանգստացրել է հայերին: Այնուամենայնիվ, վրացական խորհրդարանի որոշումը մեզ համար ունի դրական նշանակություն»:
Հիշեցնենք, որ երեկ, Վրաստանի նախագահ Միխեիլ Սաակաշվիլիի նախաձեռնությամբ, վրացական խորհրդարանը միաձայն որոշեց չեղյալ հայտարարել 2006 թվականի մարտի 31-ին Ռուսաստանի հետ կնքած՝ Վրաստանի տարածքով ռազմական բեռների ու անձնակազմի փոխադրման մասին համաձայնագիրը:
