2014 թ-ի հունվարի 1-ից ուժի մեջ է մտնելու պարտադիր կենսաթոշակային ապահովագրական համակարգը։ Ինչպես այսօր կառավարության նիստում հայտարարեց վարչապետ Տիգրան Սարգսյանը, ենթադրվում է, որ շուրջ 270 հազար քաղաքացիներ իրականացնելու են վճարումներ իրենց անհատական հաշիվների վրա և իրավունք պետք է ունենան ստանալ տեղեկատվություն, թե իրենց հաշիվների վրա ինչքան գումար է կուտակվել և պետությունն ինչպես և ինչ ծավալով է ավելացրել իրենց գումարները։ Դա ենթադրում է, որ նրանք կարող են օգտվել իրենց նույնականացման` ID քարտերով։
Տ.Սարգսյանի խոսքով՝ բողոքներ կան, որ, չնայած այն հանգամանքին, որ օրենսդրությամբ սահմանվել է, որ ID-քարտը կարող է փոխարինել անձնագիրը, բայց բազմաթիվ օղակներում քաղաքացուց, բացի ID-քարտից, պահանջում են նաև անձնագիր։
«Հիմա անցումային փուլ է, և պետք է բոլոր մարմինները սովորեն աշխատել այդ քարտերով։ Մենք մինչև տարեվերջ պետք է որակապես փոխենք իրավիճակը, և մեր ենթակառուցվածքները պատրաստ լինեն մեր քաղաքացիներին ID-քարտերով սպասարկել, որովհետև հունվարի մեկից հետո եթե 270 հազար քաղաքացի այդ ID-քարտերով սկսեն իրենց աշխատանքները, կարող ենք խնդիրներ ունենալ, եթե կառույցները պատրաստ չլինեն։ Ասենք, օրինակ, նոտարները, պետք է աշխատենք իրենց հետ, որպեսզի իրենք այդ քարտերը կարդացող սարքեր տեղադրեն և քաղաքացուն չուղարկեն անձնագրի հետևից»,- ասաց վարչապետը։
Տ.Սարգսյանը հանձնարարեց, որպեսզի պատրաստ լինեն 2014 թ. հունվարի մեկից ծառայություններ մատուցեն բոլոր քաղաքացիներին։
