ԵՊՀ-ում Վենետիկի հանձնաժողովը ՀՀ կուսակցությունների հետ քննարկում է սահմանադրական բարեփոխումների նախագիծը։ Իրավաբանական գիտությունների թեկնածու, ԵՊՀ իրավաբանական ֆակուլտետի դասախոս Ռուստամ Մախմուդյանը, ով նույնպես մասնակցում է քննարկմանը, «Առաջին լրատվական»-ի հետ զրույցում նշեց, որ կա երկրի կառավարման մոդելի հստակեցման անհրաժեշտություն։
«Սահմանադրության 89-րդ հոդվածի վիճահարույց խնդրին կարծիք էին հայտնում հիմնականում քաղաքական ուժերի ներկայացուցիչները, մասնավորապես ԱԺ-ում փոքրամասնություն կազմած քաղաքական ուժերը։ Դա ինքնին հասկանալի է, քանի որ յուրաքանչյուր փոքրամասնություն կազմող քաղաքական ուժ իր մոտ ունենում է մտավախություն հետագայում մեծամասնություն կազմելու խնդրի վերաբերյալ։ Եվ իհարկե Վենետիկի հանձնաժողովը բոլոր քաղաքական ուժերի հայտնած կարծիքների վերաբերյալ իր դիրքորոշումը արտահայտեց և ներկայացրեց առաջարկություններ և մեկնաբանություններ»,-ասաց նա։
Հարցին՝ արդյոք անկախ Հայաստանի համար այս նախագիծը ճիշտ տարբերակ է, Ռուստամ Մախմուդյանը ասաց. «Յուրաքանչյուր բարեփոխված երևույթ, այդ թվում նաև այնպիսի իրավական փաստաթուղթ, ինչպիսին Սահմանադրությունն է, իհարկե իր մեջ դրական միտումների և մեր հասարակության հոգեկերտվածքի համապատասխանության հարցը պետք է նկատի ունենա։ Կարծում եմ՝ սահմանադրական փոփոխությունների անհրաժեշտությունը կար և կային այնպիսի իրավական ինստիտուտներ, որոնք վաղուց գործում էին, և ժամանակն էր որ իրենց տեղը գտնեին Սահմանադրության մեջ»։
