Երեկ Վրաստանի խորհրդարանը միաձայն (84 կողմ) ընդունել է 2006 թվականի մարտի 31-ին Ռուսաստանի հետ կնքած Վրաստանի տարածքով ռազմական բեռների ու անձնակազմի փոխադրման մասին պայմանագրի կասեցման որոշումը: Նշենք, որ Վրաստանի տարածքով Ռուսաստանը Հայաստանում գտնվող իր ռազմաբազաներ էր հասցնում ռազմական տեխնիկա:
Ռազմավարական և միջազգային հետազոտությունների վրացական հիմնադրամի տնօրեն Ալեքսանդր Ռոնդելիի գնահատմամբ, այս որոշումը չի կարող ազդել հայ-վրացական հարաբերությունների վրա:
«Ե՛վ Վրաստանը, և՛ Հայաստանը պետք է հաշվի առնեն միմյանց անվտանգության հարցերը: Մինչ այժմ երկու երկրները միմյանց շատ լավ են հասկացել, և դա է վկայում նաև նախօրեին պաշտպանության նախարարների չափազանց արդյունավետ հանդիպումը»,- «Առաջին լրատվականի» հետ զրույցում նկատեց Ռոնդելին:
Ռոնդելիի խոսքերով, Վրաստանի իշախանությունները այս հարցում պայմանավորվել են Հայաստանի իշխանությունների հետ և զգուշացրել են այս քայլի մասին. «Կարծում եմ, որ Հայաստանի անվտանգության վրա այս ամենը չի ազդի, մենք պետք է հարգենք միմյանց հետաքրքրությունները ինչքան հնարավոր է, սակայն առաջին հերթին պետք է մտածենք սեփական անվտանգության մասին: Վրաստանը Ռուսաստանի հետ փաստացի պատերազմական իրավիճակում է, բայց նրանք շարունակում են մեր տարածքով ռազմական տեխնիկա տեղափոխել, այն էլ` այնպիսի չափերի, որը կարող է սպառնալ մեր անվտանգությանը»:
Փորձագետը նշեց, որ այս որոշումը խնդիրներ կառաջացնի Ռուսաստանի համար, որը պետք է մտածի, թե ինչպես պահպանի կապը Հայաստանում գտնվող սեփական ռազմաբազաների հետ. «Կարծում եմ` նրանք պետք է այդ ամենի մասին ավելի վաղ մտածեին»:
Այդուամենայնիվ, ըստ Ռոնդելիի, այս ամենը կարող է ռուս-վրացական լարվածությունն է՛լ ավելի խորացնել, և պետք չէ վստահ լինել, որ Ռուսաստանի կողմից Վրաստանի նկատմամբ ագրեսիա չի կիրառվի այս հարցի առնչությամբ. «Մենք միշտ ենք հաշվի առնում այդ հանգամանքը, այն բանից հետո, ինչ նրանք արեցին 2008թ., է՛լ ոչնչից զարմանալ պետք չէ, և ամեն ինչ կարելի է սպասել, սակայն այս պահին, չեմ կարծում, որ նման բան կլինի»:
Հարցին, թե ինչքանո՞վ է Վրաստանը պատրաստ դիմակայելու Ռուսաստանի նման քայլերին, Ռոնդելին պատասխանեց. «Եթե արջը հարձակվի իրենից փոքրի վրա, ինչպե՞ս կարող է վերջինս պատրաստ լինել: Արջերի հետ մի քիչ դժվար է, ոզնիների հետ է հեշտ: Արջին հակառակ չես գնա, երբ դու անգամ ոզնի չես»: