Ռուսաստանի ռազմածովային նավատորմի նավերը Սիրիայում զինված հակամարտության սրման պատճառով սիրիական Տարտուս նավահանգստի փոխարեն, որտեղ տեղակայված է նավատորմի նյութատեխնիկական ապահովման կետը, կմտնեն Լիբանանի Բեյրութ նավահանգիստ: Այս մասին ITAR-TASS-ին հաղորդել է ռազմա-դիվանագիտական ռուս աղբյուրը:
Աղբյուրի խոսքերով` համապատասխան աշխատանք արդեն տարվում է: Որպես օրինակ նա բերել է Բալթյան նավատորմի՝ վերջերս կատարած այցը Բեյրութ:
Գործակալության զրուցակիցն ընդգծել է, որ դա չի նշանակում, թե Ռուսաստանը հրաժարվում է Տարտուսի նյութատեխնիկական ապահովման կետից և ռազմածովային նավատորմի համար տեղակայման նոր կետեր է որոնում Միջերկրական ծովում:
«Տարտուսը մնում է միակ պաշտոնական կետը ռուսական նավերի տեղակայման համար: Երբ Սիրիայում իրադարձությունները կկրեն ավելի կանխատեսելի բնույթ, մենք կկարողանանք որոշել նյութատեխնիկական ապահովման կետի հետագա կիրառման հարցը»,- մեկնաբանել է աղբյուրը:
