Պաղեստինի ինքնավարության ղեկավար Մահմուդ Աբասը պատրաստ է մեղմել իր դիրքորոշումը պաղեստինյան տարածքներում իսրայելական բնակավայրերի շինարարության կապակցությամբ: Այս մասին հաղորդում է The New York Times թերթը:
Ինչպես հաղորդում է թերթը` վկայակոչելով Աբասի խոսքի սևագրերը, որոնք նրա օգնականները պատրաստել էին ԱՄՆ նախագահ Բարաք Օբամայի հետ հանդիպման համար, պաղեստինցի առաջնորդը պատրաստ է մեղմել իր պահանջը այն առումով, որպեսզի Իսրայելի ղեկավարությունը հրապարակավ խոստանա դադարեցնել բնակավայրերի շինարարությունը:
«Նա (Իսրայելի վարչապետ Բենիամին Նեթանյահուն-1in.am) կարող է գաղտնի խոստանալ ձեզ, որ կդադարեցնի բնակավայրերի շինարարությունը բանակցությունների ժամանակ»,- թերթի տվյալներով՝ Աբասը նախատեսում է նման առաջարկով դիմել Օբամային:
Տեքստի համաձայն` Պաղեստինի ինքնավարության ղեկավարն Օբամայից խնդրելու է Նեթանյահուին համոզել, որպեսզի պաղեստինցիների հետ խաղաղ բանակցություններում առանցքայինը դառնա 1967թ. սահմաններին Իսրայելի վերադարձի գաղափարը:
Բացի այդ՝ հնարավոր է, որ Աբասը կրկին պատրաստակամություն հայտնի վերաձևավորել Պաղեստինի ինքնավարությունը և Իսրայելին փոխանցել Հորդանանի Արևմտյան ափի պաղեստինյան տարածքների կառավարումը, եթե խաղաղ կարգավորման բանակցությունները չվերսկսվեն:
