Ռուսաստանի Դաշնության վարչապետ Վլադիմիր Պուտինը ապրիլի 20-ին ելույթ ունենալով երկրի խորհրդարանում` ներկայացրել է կառավարության աշխատանքը 2010թ.-ին:
Այս մասին հաղորդում է RIA-Novosti գործակալությունը:
Անդրադառնալով տնտեսական խնդիրներին Պուտինն ասել է, որ «Ռուսաստանը հաղթահարել է տնտեսական ճգնաժամը բոլոր ուղղություններով», և որ Ռուսաստանի տնտեսությունը դարձել է ավելի արդյունավետ, ինչի մասին խոսում է ՀՆԱ-ի 4 տոկոսանոց աճը 2010թ.-ին:
Նա կանխատեսել է, որ տնտեսական ճգնաժամը վերջնականապես կհաղթահարվի 2012թ.-ին: Ըստ Պուտինի` եթե Ռուսաստանի տնտեսությունը այս տասնամյակն անցկացնի առանց վայրիվերումների, ապա 2020թ.-ին կհայտնվի տնտեսապես զարգացած երկրների լավագույն հնգյակի մեջ: Նա քննադատության է ենթարկել «չարդարացված ազատականությունը», որը խանգարում է Ռուսաստանին, խոսել է երկրում միջին դասի գոյության անհրաժեշտության, կոռուպցիայի դեմ պայքարի մասին, որը հետ է մղում Ռուսաստանին:
Նավթային խնդիրներին անդրադառնալիս ՌԴ վարչապետն ասել է, որ անհրաժեշտ է պահպանել նավթի արդյունահանումը ներկայիս` տարեկան 505 մլն տոննա ցուցանիշի վրա, որպեսզի հնարավոր լինի նավթարդյունահանումից անցում կատարել տնտեսական մյուս ճյուղերի զարգացմանը:
Վերջում Պուտինը շնորհակալություն է հայտնել ժողովրդին, որի շնորհիվ տնտեսական ճգնաժամը համեմատաբար հեշտ է հաղթահարվել. «Համեմատաբար հեշտ ենք հաղթահարում: Եվ դա առաջին հերթին մեր ժողովրդի շնորհիվ է, որը համբերատար և վստահելով է վերաբերվում մեր ձեռնարկած միջոցներին»: