«Առաջին լրատվականե-ի զրուցակիցն է ՀՀԿ պատգամավոր Հակոբ Հակոբյանը:
– Պարոն Հակոբյան, ավարտվե՞ց Ֆինանսների նախարարության հետ «Կիլիկիա» գարեջրի գործարանի այն դատական վեճը, որի համաձայն ընկերությունը մոտ 650 մլն դրամի տուգանքի էր ենթարկվել:
– Կարծում եմ, որ Վճռաբեկ դատարանն իր վճիռը առաջիկայում կհրապարակի: Դուք գիտեք, որ առաջին ատյանի և Վերաքննիչ դատարաններն իրենց վճիռը մեր օգտին են կայացրել: Կարծում եմ ամեն ինչ նորմալ կլինի:
– Հայաստանից հատկապես դեպի Ռուսաստան արտահանման նվազման տեմպերը չեն բարելավվում: Ի՞նչ վիճակում է գտնվում Ձեր սեփականությունը հանդիսացող «Կիլիկիա» գարեջրի արտահանումը:
– Մեզ մոտ նորմալ վիճակ է, այս տարվա յոթ ամիսների կտրվածքով մենք արտահանման 12 տոկոս աճ ենք ունեցել: Միգուցե զարմանալի է, բայց այդպես է: Մենք հիմնականում Ռուսաստան ենք արտահանում:
– Բայց բոլոր արտահանողների մոտ անկում է գրանցվում, ձեզ մոտ ինչպե՞ս է աճ արձանագրվում:
– Մենք բոլորի պես չենք մտածում, մենք ոչ միայն շահույթով չենք աշխատում, այլ վնասով ենք աշխատում: Բայց քանի որ ավելի քան 10 տարի արտահանում ենք իրականացնում և քայլ առ քայլ առաջ ենք գնացել, հիմա մեր գարեջուրը ռուսական շուկայում կայացած բրենդ է: Հիմա եթե մենք ընկնենք շահույթի հետևից, պիտի չարտահանենք: Եթե չարտահանենք, շուկա կկորցնենք, իսկ հետո ավելի մեծ գումարներ և երկար ժամանակ պետք է ծախսենք, որ այդ շուկան վերականգնենք կամ նորը գտնենք: Դրա համար նպատակահարմար ենք գտել, որ թեկուզ շահույթ չունենանք, բայց չպակասացնենք արտահանման ծավալները: Վաճառքի գինը ծախսերը չի փակում: Իսկ թե ինչքան վնաս ենք կրել, պարզ կդառնա տարեվերջին՝ ծախսերն ու եկամուտները ամփոփելուց հետո: Չի բացառվում անգամ, որ պարզապես զրոյական վիճակ ունենանք:
– Վերջին շրջանում սկսել են ավելի շատ ռուսական գարեջուր ներկրել մեր երկիր: Դա չի՞ խոչընդոտում «Կիլիկիա»-ի ներքին սպառմանը:
– Հայաստանում միշտ էլ ռուսական գարեջուր եղել է, պարզապես մեր ժողովուրդը բավականին ճիշտ մոտեցում է ցուցաբերում և հիմնականում «Կիլիկիա» գարեջուր է խմում:
– Հայաստանում գարեջրի ներքին սպառման ո՞ր մասն է ձեզ բաժին ընկնում:
– Չեմ կարող ասել, թե որքանն է, բայց մեծ մասը մերն է: Ավելացնեմ, որ արտահանման ճգնաժամը հիմնականում տեղի է ունեցել անցած դեկտեմբերին դոլարի արժևորման արդյունքում: Դա նաև պայմանավորված է Ռուսաստանում գոյություն ունեցող ճգնաժամային վիճակով, ռուբլու փոխարժեքի անկումով: Եթե ՌԴ-ում իրավիճակը կայունանա, մեզ մոտ կսկսի դեպի վեր գնալ: Ես կարծում եմ, որ Եվրասիական տնտեսական միությանն անդամակցելուց հետո պետք է որ ավելի լավ աշխատենք, որպեսզի ավելի լավ լինի մեր վիճակը: Կարծում եմ, որ մեր արտահանման հիմնական շուկան այդ տարածքն է ու հատկապես Ռուսաստանը: Եվ ավելի լավ կլինի, եթե կարգավորվի ռուբլու փոխարժեքը:
– Բայց վերջին շրջանում ռուբլու փոխարժեքը նորից սկսել է ընկնել:
– Այո, մի պահ կայունացավ, բայց հիմա նորից սկսել է արժեզրկվել: Բայց հույս կա, որ աշնանը նորից կկայունանա:
– Իսկ ինչո՞ւ չեք փորձում այլ շուկաներ գտնել, չէ՞ որ միայն ՌԴ-ից նման կախվածությունը ծանր վիճակի մեջ է դնում հայ արտադրողին:
– Կարծում եմ՝ առայժմ այդ հնարավորությունը չկա: Իհարկե, մենք այլ երկրներ նույնպես արտահանում ենք, մեր գարեջուրը Ֆրանսիայում էլ կա, Լեհաստանում էլ կա, կա ևս մի քանի այլ երկրներում: Բայց այդ շուկաներում մեզ համար դժվար է, թեև մեր գարեջուրը մեծ համբավ ունի:
– Հայաստանում արտադրվում է նաև «Կոտայք» գարեջուրը, որը պատկանում է Գագիկ Ծառուկյանին, ինչպես նաև «Գյումրի» գարեջուրը, որը պատկանում է Գյումրիի քաղաքապետ Սամվել Բալասանյանին: Այսինքն՝ մեծ մրցակցություն կա: Ձեզ համար դժվար չէ՞ մրցակցել հատկապես Գ. Ծառուկյանի հետ, քանի որ նա կարող է խոչընդոտել ազատ մրցակցությանը:
– Մենք նման խնդիր չունենք, քանի որ մեր ազգի մեծամասնությունը նախընտրում է «Կիլիկիա» գարեջուր: Մեր նեղ վիճակներում միշտ մեր կողքին է եղել:
Լուսանկարը՝ Photolure-ի
