Նյու Յորքի հայտնի Ազատության արձանը այցելուների համար կբացվի «Սենդի» փոթորկից 9 ամիս անց՝ այս տարվա հուլիսի 4-ին, երբ ԱՄՆ-ում նշվում է ազգային ամենագլխավոր տոներից մեկը՝ Անկախության օրը: Այս մասին հայտնել է Նյու Յորք նահանգից սենատոր Չարլզ Շումերը:
Արձանը այցելուների համար փակ էր անցած տարվա հոկտեմբերից, երբ Նյու Յորքը պատուհասեց «Սենդի» փոթորիկը՝ խլելով ավելի քան 130 մարդու կյանք ու ԱՄՆ-ի տնտեսությանը հասցնելով 60 մլրդ դոլարի վնաս:
Փորձագետների գնահատմամբ՝ արձանը փոթորկից չի տուժել, սակայն մասնագետները մինչ օրս զբաղվում են Լիբերթի Այլենդ կղզում փոթորկի հետևանքների վերացմամբ՝ հայտնում է ITAR-TASS-ը: Մասնավորապես, վերանորոգվում է կառամատույցը, որտեղ կայանում էին Մանհեթենի ու հարևան Նյու Ջերսի նահանգի զբոսաշրջիկների նավերը: Վերականգնվում է նաև կղզու էլեկտրասնուցումը:
Հունվարին 59 մլն դոլար տրամադրվեց՝ փոթորկից տուժած ազգային պարկերի, այդ թվում՝ Լիբերթի Այլենդի վերականգնման համար:
