Պատմության մեջ առաջին անգամ ՄԱԿ-ն այսօր նշում է Երջանկության միջազգային օրը: Օրվա առթիվ իր առաջին ուղերձում ՄԱԿ-ի գլխավոր քարտուղար Պան Գի Մունը հայտարարել է, որ երջանկությունն ընկած է մարդկային ցանկությունների հիմքում: Այս մասին հայտնում է ITAR-TASS-ը:
Նա ափսոսանք է հայտնել առ այն, որ տարրական նյութական բարեկեցությունը, ինչպես նախկինում, անհասանելի է մնում չափազանց մեծ թվով մարդկանց համար, որոնք ապրում են ծայրաստիճան աղքատության մեջ:
«Ես կոչ եմ անում բոլորին ամրապնդել հակվածությունը մարդկային ներուժի բազմակողմանի և կայուն զարգացմանը և կրկին հայտարարել այլոց օգնելու պատրաստակամության մասին: Կարեկցանքը նպաստում է երջանկությանը և կօգնի կառուցել ապագան որը մենք ցանկանում ենք»,- ասել է Պան Գի Մունը:
Նա հանդես է եկել այն երկրների ցուցակի ընդլայնման օգտին, որոնք մասնակցում են քաղաքացիների բարեկեցության բարելավմանը, սոցիալական զարգացմանը և շրջակա միջավարի պաշտպանությանն ուղղված ազգային ռազմավարությունների մշակմանը: ՄԱԿ-ում վստահ են, որ այդ երեք գործոնները մարդկային երջանկության պարտադիր բաղադրիչներ են:
Հաղորդվում է, որ օրվա առթիվ առաջին միջոցառումը ՄԱԿ-ի կենտրոնակայանում կդառնա հայտնի հնդիկ հոգևոր ուսուցիչ Շրի Չինմոյի «Երջանկության գանձ» գրքի ներկայացումը:
Մարտի 20-ը Երջանկության օր հռչակող բանաձևը ՄԱԿ-ի Գլխավոր ասամբլեայի կողմից ընդունվել է 2012-ի հուլիսի 12-ին:
