Անշարժ գույքի շուկայի գնահատող ընկերությունների գործունեության հետ կապված՝ կառավարության նախորդ նիստում հարցադրումներ բարձրացվեցին, որին անդրադարձել է Համաշխարհային բանկը:
Երեկ ՀՀ տնտեսական մրցակցության պաշտպանության պետական հանձնաժողով են հրավիրվել բանկերում գրավադրվող անշարժ գույք գնահատողները, և քննարկվել է խնդիրը: Ինչպես այսօր լրագրողների հետ ճեպազրույցում հայտարարեց ՏՄՊՊՀ նախագահ Արտակ Շաբոյանը, այս ոլորտում կան խնդիրներ, որոնք լուծման կարիք ունեն:
«Մինչև շաբաթվա վերջ առաջարկություններ կներկայացնենք այս ոլորտի խնդիրների կարգավորման ուղղությամբ»,- ասաց Ա. Շաբոյանը:
Անդրադառնալով խոշոր տնտեսվարողների գործունեությանը, երբ դրանք նաև մանրածախ շուկայում են գործում և տարբերակված մոտեցում ցուցաբերում այլ մանրածախ տնտեսվարողների հանդեպ, Շաբոյանը նկատեց, որ տարբերակված մոտեցումը պետք է բացառել, դա հակամրցակցային է և կարող է չարաշահման ռիսկեր առաջացնել:
Ըստ Շաբոյանի՝ հարկային և մաքսային ոլորտում առկա են շատ խնդիրներ, որ դուրս են ՏՄՊՊՀ իրավասության դաշտից, բայց ազդում են մրցակցային խնդիրների վրա:
