Հայտնի, սակայն նախկինում ավտոմեքենաների դիզայնով չզբաղված մասնագետներին հրավիրելը սովորական երևույթ է ավտոարտադրողների համար: Առավել հաճախ հրավիրված մասնագետները լինում են ինտերիերի դիզայներներ, սակայն Renault-ն այդ հարցում վստահել է ժամացույցների և կահույքի ստեղծողին: Այս մասին հայտնում է Vesti-ն:
Բրիտանացի Ռոս Լավգրոուվը հայտնի է արդյունաբերական և ճարտարապետական դիզայնի իր յուրօրինակ աշխատանքներով: Նա ստեղծել է ձեռքի ժամացույցներ, օծանելիքների տարաներ, կահույք, սանտեխնիկա և այլն:
Renault-ի ներկայացուցիչները հաստատում են, որ ընկերության համագործակցությունը Լավգրոուվի դիզայներական ստուդիայի հետ ապրանքանիշի դիզայներական «նոր լեզու» կստեղծի:
Բրիտանացի դիզայների հանրաճանաչությունը հիմնականում կապված է նրա արտասովոր ոճի հետ: Նա լայնորեն կիրառում է կենդանի բնության մոտիվները՝ նախապատվությունը տալով պարզությանը: Նա շատ ուշադիր է շրջակա միջավայրի մաքրության հանդեպ:
Renault-ը կարծում է, որ այդ արժեքներն էլ կընդգրկվեն նոր կոնցեպտի ինտերիերում: Նախատեսվում է, որ շարժիչը կլինի էլեկտրական, որպեսզի մթնոլորտ չարտանետվի ոչ մի գրամ վնասակար նյութ:
Կոնցեպտը նախատեսվում է ներկայացնել ապրիլի 8-ին՝ միլանյան Տրիենալեում (Դիզայնի իտալական թանգարանի մի մասն է):
