Հանրապետության հրապարակում Էլեկտրաէներգիայի սակագնի բարձրացման դեմ բողոքի ակցիա անող «Ոտքի՛, Հայաստան» նախաձեռնության անդամները օգոստոսի 11-ի հանրահավաքի օրը խորհրդարանական ընդդիմադիր ուժերին առաջարկեցին միավորվել ու միասնաբար պայքարել Սերժ Սարգսյանի իշխանության դեմ։ Շարժման ներկայացուցիչ Դավիթ Սանասարյանն ասաց, որ սկսելու են բանակցությունները քաղաքական ուժերի հետ։ Բացի այս շարժումից՝ «միացյալ ճակատ»-ի ձևավորմանն է լծվել նաև Հիմնադիր խորհրդարանը, որն այս փուլում բանակցում է այլ ուժերի հետ։ Թե որքանով է հավանական, որ այս ուժերին կարձագանքեն ընդդիմադիր կուսակցությունները, թեմայի շուրջ «Առաջին լրատվական»-ը զրուցել է ՀԱԿ խմբակցության պատգամավոր, Վերակազմյալ Սոցիալ Դեմոկրատ Հնչակյան կուսակցության ատենապետ Լյուդմիլա Սարգսյանի հետ։
– «Ոտքի՛, Հայաստան»-ը կոչ արեց, որ ընդդիմադիր ուժերը միանան իրենց՝ միասնաբար պայքարելու Սերժ Սարգսյանի դեմ։ Դուք ինչպե՞ս եք տրամադրված նրանց առաջարկին։
– Ճիշտն ասած, ես չեմ կարծում, որ դա այն քաղաքական ուժն է, որը կարող է միավորող լինել։ Ես կարծում եմ, որ կան կուսակցություններ, որոնք եթե կարողանան նախաձեռնել ու բանակցել, միգուցե արդյունք տա։ Չեմ կարծում, որ այդ նախաձեռնությունը կկարողանա հաջողության հասնել։ Առայժմ այդ ուժի առաջարկի արձագանքը տեսանելի չէ, չեմ կարծում, որ որևէ քաղաքական ուժ կմիանա իրենց։
– Ժիրայր Սեֆիլյանի գլխավորած ուժը նախաձեռնել է միացյալ ճակատի ձևավորումը։ Իսկ այս ուժի հետ պատրաստվո՞ւմ եք ճակատ կազմել՝ ընդդեմ իշխանությունների։
– Ճիշտն ասած, վերջին երկու տարվա նրա գործունեությունը չի ձևավորել հաջողության հասնելու մեծ վստահություն, նրանց հետ միավորվելու հավանականություն ևս չեմ տեսնում։
– Սահմանադրական փոփոխությունների նախագծի շուրջ քաղաքական ուժերի համախմբում հնարավոր համարո՞ւմ եք։
– Համենայնդեպս մինչև հիմա ակտիվություն չկա այդ ուղղությամբ, տեսանելի չէ ոչինչ։ Ես մտահոգություն ունեմ, որ քաղաքական ուժերը բավականին տարանջատված են, և միավորվելու խնդիր կա։ Ամեն դեպքում, դեռ տեսանելի չէ՝ կմիավորվեն դրա շուրջ, թե ոչ։
– Նախագծի 15 գլուխ հրապարակվել է, Դուք ի՞նչ դիտարկումներ ունեք, ինչպիսի՞ն է Ձեր դիրքորոշումն այս փաստաթղթի վերաբերյալ։
-Սահմանադրական փոփոխությունների նախագծի վերաբերյալ ունենք վերապահումներ կոնկրետ Ազգային Ժողովի ձևավորման երկրորդ փուլ անցկացնելու մասով, էլի հարցեր կան, սակայն կարծում եմ՝ գլխավոր խնդիրը պաշտպանության համակարգի խնդիրն է։ Օրինակ՝ կուսակցությունն այն կարծիքին է, որ զինված ուժերի հիերարխիան հստակ պիտի սահմանված լինի Սահմանադրությամբ. ով է գլխավոր հրամանատարը, և ոչ թե ինչպես իրենք են առաջարկում, պատերազմի ժամանակ մի պաշտոնյա է գլխավոր հրամանատարը, խաղաղության ժամանակ՝ մեկ այլ։
Ամեն դեպքում, մենք դեռ չենք մտնում բովանդակային քննարկման մեջ, քանի որ կուսակցությունը հստակ դիրքորոշում չի ձևավորել Սահմանադրական փոփոխությունների նկատմամբ, բայց այդուհանդերձ ինչ վերաբերում է խորհրդարանական կառավարման համակարգին և համամասնական ընտրակարգի անցմանը, բնականաբար, կարելի է գնահատել քայլ առաջ, եթե մեզ մոտ ժողովրդավարական ընտրական մեխանիզմները գործեին և ժողովրդի մտավախությունը փարատվեր։ Բայց քանի որ կա ընդհանուր անվստահություն իշխանության նկատմամբ, ինչը հիմնավորված է, բնականաբար, ժողովուրդն ունի մտահոգություններ՝ Սահմանադրական փոփոխությունների հետ կապված, և ընդհանրապես ամեն ինչի, ինչ նախաձեռնում է իշխանությունը, նույնիսկ եթե դա ազնիվ մղումներով է արվում։
– Ձեզ համար հիմա անընդունելի՞ է այս տեսքով նախագիծը, տիկի՛ն Սարգսյան։
– Ես չեմ ուզում իմ կարծիքը հիմա ասել, քանի որ վերջնական կարծիք դեռ չի ձևավորվել։ Ես իմ անձնական կարծիքն ունեմ և չեմ ուզում դա հիմա հրապարակել՝ ճնշելով կուսակիցներիս կարծիքը։ Այժմ քննարկումներ են, վարչությունը կկայացնի իր որոշումը նախագծի վերաբերյալ, որից հետո մենք կհայտարարենք։
-Սերժ Սարգսյանը հայտարարել է, որ չի առաջադրվելու ո՛չ վարչապետի, ո՛չ Աժ նախագահի, ո՛չ էլ նախագահի պաշտոնում, մինչդեռ որոշ քաղաքական ուժեր հայտարարում են, որ այն միտված է Սերժ Սարգսյանի իշխանության վերարատադրմանը։ Այս դեպքում ո՞ր ուժերի վերարտադրմանն է նպաստելու նոր Սահմանադրությունը։
-Դե գիտեք, վերարտադրվել միշտ էլ կարելի է, այսօր Հանրապետական կուսակցությունը վերարտադրվելու մեծ հնարավորություն ունի, քանի որ ունի իշխանական մեծ լծակներ։ Եթե նույնիսկ նոր սահմանադրությունը չանցնի, միևնույն է, իշխանությունը վերարտադրվելու նույն հնարավորություններն է ունենալու։ Այնպես որ եթե լսենք, թե ինչ կերպ է ներկայացնում Սերժ Սարգսյանը Սահմանադրական փոփոխությունները և ինչ դրական ու բացասական կետեր է փաստում, ինձ մոտ տպավորություն է, որ ինքն էլ առանձնապես հակված չէ, որ Սահմանադրական փոփոխության նախագիծը անցնի։ Սա այն նախագիծն է, որը երկրի անվտանգության երաշխիքներ չի ապահովում, իսկ գործողը ապահովում է, որի մասին բարձրաձայնել է նաև երկրի ղեկավարը։
