ԱԺ ՀԱԿ խմբակցության պատգամավոր Նիկոլ Փաշինյանը շրջանառության մեջ է դրել «Տեսանկարահանող կամ լուսանկարահանող սարքերով հայտնաբերված ճանապարհային երթևեկության կանոնների խախտումների վերաբերյալ գործերով իրականացվող վարչական վարույթի առանձնահատկությունների մասին» Հայաստանի Հանրապետության օրենքում լրացումներ կատարելու մասին օրենքի նախագիծը: Նախագծով առաջարկվում է՝ եթե արագաչափերով արձանագրված խախտումը կատարվել է 15 տարի և ավելի հնության մեքենայով, առնվազն 10 տարվա և 250-350 ձիաուժ շարժիչով մեքենայով, առնվազն 5 տարվա և 120-250 ձիաուժ շարժիչով մեքենայով, մինչև 120 ձիաուժ հզորությամբ ցանկացած տարիքի մեքենայով, բեռնատար մեքենայով, ավտոբուսով կամ միկրոավտոբուսով, այդ դեպքերում նշանակվում է տուգանք Վարչական օրենսգրքով սահմանված տուգանքի կեսի չափով: Առաջարկվող փոփոխությունը չի տարածվում «կենդանի» արձանագրված խախտումների վրա, չի տարածվում նաև այն դեպքերի վրա, երբ արագաչափերով և տեսախցիկներով արձանագրված խախտումներն իրականացվում են ճոխ և համեմատաբար ճոխ մեքենաներով:
Նախագծի հեղինակը մատնանշել էր, որ նախագիծը առնվազն լավ առիթ պիտի դառնա, որպեսզի լրջորեն քննարկենք, թե ինչպես պետք է ազատվել արագաչափերի և երթևեկությանը հետևող տեսախցիկների անընդունելի հարստահարումից:
«Առաջին լրատվական»-ը նախագծի վերաբերյալ զրուցեց «Դուրս մեր գրպանից» նախաձեռնության անդամ Արման Սուլեյմանյանի հետ: Նա ընդգծեց, որ նախագծի մասով քննարկման եզր չի տեսնում. «Ես վարում եմ մեքենա, որ 26 տարեկան է, բայց ես չեմ կարծում, որ այս օրինագիծը առհասարակ ինչ-որ մեկին պետք է»: Ըստ նրա ՝ պետք է նախ և առաջ խախտում կատարող մեքենաների քանակի նվազեցման ուղղությամբ աշխատել, անվտանգ երթևեկության մասին մտածել, իսկ տուգանքների չափը նվազեցնելով կամ պակասեցնելով՝ ճանապարհային երթևեկությունը ոչ մի կերպ չի կանոնակարգվում. օրինակ՝ անհրաժեշտ է ընդհանրապես հրաժարվել տեսախցիկներից:
Արման Սուլեյմանյանի դիտարկմամբ՝ տեսախցիկները ի սկզբանե չունեն տրամաբանություն, դրա բացատրությունը շատ պրիմիտիվ է, տեսախցիկները պետք է տեղադրվեն ըստ մեթոդաբանության, որը Հայաստանում չկա. «Հայաստանի երթևեկությունը հիվանդ է քաղցկեղով, այն, ինչ առաջարկում են պատգամավորները, մոտավորապես նույնն է, որ քաղցկեղով հիվանդի ոտքերը դնեք տաք ջրի մեջ կամ ասպիրին տաք. սա ոչ մի հարց չի լուծում, ոչ մի ձևով չի օգնում»:
Նա ընդգծեց, որ առաջարկվող նախագծին իրենք դեմ չեն՝ թող լինի, բայց դրա հետ առանձնապես մեծ հույսեր չեն փայփայում. «Ես անձամբ հույսեր չեմ տածում, որովհետև եթե հարգարժան պատգամավորի իմփիջմենթի նախագիծը կյանքի կոչվեր, հիմա սրա մասին չէինք էլ խոսի: Ես շատ կասկածամտորեն եմ վերաբերվում, որ այս կամ այն նախագիծը կարող է օգուտ բերել վարորդներին, որովհետև իրենք խորքային չեն»:
Մեր զրուցակիցը նշեց, որ իրենց խնդիրը համակարգը ուղղելն է, մտածողության փոփոխությունը, իսկ այս նախագծի նման աննշան նախագծերը չեն կարող մտածողություն փոփոխել:
Մանրամասները՝ տեսանյութում:
