ՆԱՏՕ-ի գլխավոր քարտուղար Անդերս Ֆոգ Ռասմուսենը հայտարարել է, որ դաշինքը մտադիր չէ մասնակցել սիրիական ընդդիմությանը ԵՄ երկրներից զենքի մատակարարման էմբարգոյի հնարավոր հանման հարցի քննարկմանը։ Այս մասին գրում է RIA Novosti-ն:
«Դա եվրոպական հարց է՝ Եվրոպական միությանը: Ես խոսում եմ ՆԱՏՕ-ի անունից՝ որպես գլխավոր քարտուղար: Ես մտադիր չեմ ներքաշվել այդ քննարկման մեջ, որը տեղի է ունենում Եվրոպական միության շրջանակներում»,- ասել է նա լրագրողներին՝ Բրյուսելում:
Եվրոպական խորհրդի նախագահ Հերման վան Ռոմպեյը ուրբաթ օրը կայացած գագաթաժողովի արդյունքում չի բացառել Եվրամիության երկրների կողմից սիրիական ընդդիմությանը զենքի էմբարգոյի հարցում հնարավոր համաձայնության ձեռք բերումը:
Նա հայտնել է նաև, որ ԵՄ երկրների ղեկավարներն ԱԳՆ ղեկավարներին հանձնարարել են Դուբլինում կայանալիք հանդիպմանն առաջնային քննարկել Սիրիայում ստեղծված իրավիճակն ու «զենքի էմբարգոյի հնարավոր հանումը», ինչպես նաև՝ մշակել մեկ միասնական դիրքորոշում խնդրի վերաբերյալ:
