Ադրբեջանական Turan լրատվական գործակալության փոխանցմամբ՝ Եվրոպայի Խորհրդի գլխավոր քարտուղար Թորբյորն Յագլանդը դատապարտել է Ադրբեջանում իրավապաշտպան Լեյլա Յունուսի ու նրա ամուսնու՝ Արիֆ Յունուսի նկատմամբ կայացված դատավճիռը։
Յագլանդի հայտարարությունը տարածել է նրա մամլո քարտուղարը: Դրանում Ադրբեջանի իշխանություններից պահանջվում է ներկայացնել դատավարության մասին լիարժեք տեղեկատվություն և մեղադրյալներին ներկայացված ապացույցները։
Յագլանդի մամլո քարտուղարը հայտարարել է. «Հաշվի առնելով Ադրբեջանի դատական համակարգի պարբերական թերությունները և մարդու իրավունքների ոլորտում իրավապաշտպաններին ու լրագրողներին հալածելու դեպքերի աճի տագնապահարույց միտումը, որոնք իրենց հերթին բացասական ներգործություն են ունենում երկրում խոսքի ազատության վրա՝ Յագլանդը կարծում է, որ դատավճիռը վերջին հաշվով կարող է դիտարկվել ՄԻԵԴ-ում»։
Հիշեցնենք, որ երեկ Արիֆ Յունուսը մեղավոր է ճանաչվել Ադրբեջանի քրեական օրենսգրքի 178.3.2 հոդվածով (խարդախություն՝ խոշոր չափի վնաս պատճառելով), իսկ Լեյլա Յունուսը մեղավոր է ճանաչվել Ադրբեջանի ՔՕ 178.3.2, 192.2.2 (ապօրինի ձեռնարկատիրություն), 213.2.2 (հարկերի վճարումից խուսափում), 320.1 և 320.2 (փաստաթղթերի կեղծում) հոդվածներով։
Ավելի վաղ դատախազը պահանջել էր Լեյլա ու Արիֆ Յունուսներին դատապարտել ընդհանուր 20 տարվա ազատազրկման, ընդ որում՝ Լեյլայի համար առաջարկվել էր 11 տարվա, իսկ Արիֆի համար՝ 9 տարվա ազատազրկում։
