Հռոմի Պապը հավատացյալներին հնազանդության, իսկ եկեղեցուն կարեկցանքի կոչ է արել: Ֆրանցիսկոս I-ն այսօր առաջին անգամ Սուրբ Պետրոսի հրապարակին նայող իր աշխատասենյակի պատուհանից հանդես է եկել կիրակնօրյա «Անգելուս» աղոթքով:
Դիմելով հրապարակում հավաքված տասնյակ հազարավոր ուխտավորներին՝ Պապը հիշել է Ավետարանի այն առակը, որտեղ Հիսուսը չմեղադրեց մեղսագործուհուն: Պապն առիթն օգտագործել է, որպեսզի հիշեցնի համբերատարության և հանդուրժողականության մասին: Նա մեջբերում է կատարել գերմանացի կարդինալ Կասպերի նոր գրքից, որտեղ խոսվում է Քրիստոսի անսահման ներողամտության մասին:
Առավոտյան Պապն առաջին անգամ Հռոմի եպիսկոպոսի կարգավիճակում պատարագ է անցկացրել Սուրբ Աննայի եկեղեցում, որը գտնվում է Վատիկանի տարածքում: Նա շատ ջերմ և ոչ պաշտոնական շփվել է հավատացյալների հետ և կրկին հիշեցրել հադուրժողականության ու անձնական համեստության մասին:
Ընդ որում, Ֆրանցիսկոս I-ը դեռ պաշտոնապես չի տեղափոխվել իր նախորդի բնակարանը, սակայն մուտքի դռներից արդեն հանվել է կնիքը: Կախվել է ավանդական կարմիր գորգը, սակայն առանց Վատիկանի նոր ինքնավարության գերբի, որը դեռ չի ներկայացվել հանրությանը:
