Մուսուլմանական աշխարհի մի շարք իրավապաշտպան խմբեր անհանգստություն են հայտնել կանանց նկատմամբ բռնության դեմ պայքարի ծրագրի մշակմանն ուղղված արաբական մի քանի երկրների կառավարությունների բացասական արձագանքի առնչությամբ: Նախաձեռնության հեղինակը ՄԱԿ-ն է: Իրավապաշտպան կազմակերպությունները երկրների կառավարություններին կոչ են արել դատապարտել և վերացնել կանանց հետ դաժան վերաբերմունքի պրակտիկան, նույնիսկ այն դեպքերում, երբ դրա հիմքում պետության մշակութային և կրոնական ավանդույթներն են: Այս մասին հայտնում է MIGnews.com-ը:
Եգիպտոսի «Մուսուլման եղբայրներ» կուսակցության քաղաքական թևի ներկայացուցիչները իրենց անհամաձայնությունն էին հայտնել ՄԱԿ-ի փաստաթղթի հանդեպ: Շարժման ներկայացուցիչները մասնավորապես դժգոհություն են հայտնել ՄԱԿ-ի նախաձեռնության այն դրույթների հանդեպ, ըստ որոնց՝ ողջունելի են սեռական ազատությունները՝ հղիության արհեստական ընդհատումներն ու նույնասեռականների իրավունքների պաշտպանությունը:
Կահիրեի վերաբերմունքի պատճառով առաջարկվել է փաստաթղթում մտցնել ուղղում, համաձայն որի՝ յուրաքանչյուր երկիր հնարավորություն կունենա այն ընդունել ըստ տեղի օրենքների և սովորույթների:
Լիբիայի կրոնական վերնախավը նույնպես բացասաբար է արձագանքել նախաձեռնությանը՝ փաստարկելով, որ այն խախտում է իսլամական ուսմունքը:
Կանանց իրավունքների ակտիվիստները մշտապես բարձրաձայնում են իրենց հիասթափությունն առ այն, որ «Արաբական գարունը» չի բարելավել կանանց վիճակը հասարակության մեջ:
