Ինչպես հայտնի է, ԵԽԽՎ աշնանային նստաշրջանում կլսվի Հայաստանի հարցը: Դրանից առաջ` մայիսի սկզբին, Եվրոպայի խորհրդի Մարդու իրավունքների հանձնակատար Թոմաս Համարբերգը կհրապարակի իր զեկույցը:
Օրերս Մոնիտորինգի հանձնաժողովում ընթացել են Հայաստանի հարցով քննարկումները, իսկ ԵԽ-ի պաշտոնական կայքում Հայաստանի ստանձնած պարտավորությունների և հանձնառությունների կատարման վերաբերյալ համազեկուցողների տեղեկատվությունն է տեղադրված assembly.coe.int/CommitteeDocs/2011/amondoc12rev_2011.pdf:
«Առաջին լրատվականը» Հայ ազգային կոնգրեսի արտաքին հարաբերությունների հանձնաժողովի անդամ Մարթա Այվազյանին խնդրեց գնահատել վերոնշյալ տեղեկատվական նյութը: Մ.Այվազյանը նախ նշեց, որ այս փաստաթղթում արտացոլված է` ԵԽԽՎ բանաձևերի կատարման ընթացքը,մասնավորապես այն, ինչ վերաբերում է Մարտի 1-ի դեպքերին, տասը սպանությունների բացահայտման բացակայությանը, սպանությունների հանգամանքներին, և շեշտվում է պատասխանատուների հարցը: Մ.Այվազյանը կարևորեց այն, որ փաստաթղթում հղում է կատարվել քաղբանտարկյալների խնդրին, նշվել է Նիկոլ Փաշինյանի և Սասուն Միքայելյանի մասին, մասնավորապես վերջինիս պարագայում նշվել է նրա առողջական վիճակը` այն համարելով հիմնավոր պատճառ նրան ազատ արձակելու համար:
«Առանձնահատուկ ուշադրություն կարելի է դարձնել նրան, որ համազեկուցողները գնահատելով ընդհանուր վիճակը` փաստում են, որ Մարտի 1-ի դեպքերի չբացահայտումը շարունակում է բացասական ազդեցություն ունենալ Հայաստանի ներքաղաքական իրավիճակի վրա և գումարվելով սոցիալական ծանր իրավիճակին` կարող է նոր խռովությունների ալիքի պատճառ հանդիսանալ», նշեց Մ.Այվազյանը:
«Առաջին լրատվականի» հարցին, թե փաստաթուղթը աշնանային նստաշրջանից առաջ ի՞նչ ազդեցություն կարող է ունենալ` Մ.Այվազյանը պատասխանեց. «Փաստաթուղթը թեև խիստ է, բայց բավական ուշացած է: Բացի այդ, Մոնիտորինգի հանձնաժողովը ինչ-որ չափով սպառել է իր նշանակությունը մեր հասարակության համար: Սակայն սա կարող է խթան հանդիսանալ աշնանային նստաշրջանից առաջ, որպեսզի մեկ անգամ ևս զգուշացնեն իշխանություններին` հնարավոր բացասական զարգացումներից ձերբազատվելու նպատակով:
Փաստաթղթից երևում է, որ իշխանություններն այս ընթացքում կորցրել են վստահությունը. բազմաթիվ խոստումները չեն կատարվել: Փաստաթղթում շեշտը դրվել է պահանջների իրականացման ուղղությամբ: Ինչ վերաբերում է փաստաթղթի խիստ տոնայնությանը, ապա դրա պատճառը թերևս այն է, որ ԵԽ-ն ցանկանում է փրկել իր դեմքը, քանի որ անդամ պետությունում արդեն երեք տարի է` գոյություն ունեն քաղբանտարկյալներ, բացահայտված չեն տասը քաղաքացիների սպանությունները, բանակի մասնակցությունն արդեն դարձել է ակնհայտ, ինչի մասին վկայում է ԱՄՆ Պետդեպարտամենտի զեկույցը, և նրանք պարտավոր էին այս ամենը ինչ-որ կերպ արտացոլել»: