Յուտա նահանգի Դրափեր քաղաքի երկու բնակիչներ, ովքեր ֆինանսական դժվարություններ են ունեցել ցանկացել են արագ և հեշտ հարստանալ:
Առևտրի կենտրոնի աշխատակիցներ 39-ամյա Քերոլ Լին և 35-ամյա Մայքլ Քոնդորը, խոսելովիրենց չիրականացած ծրագրերի մասին, հիշել են, թե որքան առատաձեռն են լինում խանութների տերերը և սննդի արտադրողները, երբ գնորդները նրանց արտադրանքի մեջ օտար մարմիններ են հայտնաբերում:
Հնարամիտ զույգը միանգամից պլան է մշակել, որտեղ գլխավոր տեղը տրվել է Smith’s Food մթերային խանութներին, որտեղից նրանք միշտ հացաբուլկեղեն են գնել:
Քերոլը և Մայքլը որոշել են լցոնել փքաբլիթներն ածելիներով, իսկ հետո հասցված վնասի համար փոխհատուցում պահանջել: Ավելին, նրանք նաև որոշել են կուլ տալ ածելիներից մեկը փոխհատուցումը հաստատ ստանալու համար:
Իր նախագիծն իրականացնելուց հետո զույգը զանգահարել է խանութի տիրոջը՝ հայտնելով, որ մտադիր են դատարան դիմել: Վերջինս հրահանգել է աշխատակիցներին ստուգել բոլոր փքաբլիթները, սակայն դրանք օգտագործման համար անվնաս են եղել: Ոստիկանությունը, ելնելով այդ տվյալներից, հարցաքննել է Քերոլին ու Մայքլին, իսկ փորձագետներն ուշադիր ուսումնասիրել են փքաբլիթների՝ նրանց մոտ եղած պլաստիկե տուփերը: Շուտով պարզվել է, որ դրանք բացվել, այնուհետև նորից փակվել են:
Ի վերջո, «հնարամիտներն» ընդունել են իրենց մեղքը:
