Վճռաբեկ դատարանը մինչև մարտի 21-ը կորոշի ՀԱԿ ակտիվիստների ճակատագիրը: Այս մասին «Առաջին լրատվական»-ի հետ զրույցում ասաց ՀՀ դատական դեպարտամենտի Միջազգային համագործակցության և հասարակայնության հետ կապերի ծառայության պետ Արսեն Բաբայանը: Նա նշեց, որ երիտասարդների գործով լրացուցիչ բողոքը դատավորների վրա մակագրվել է փետրվարի 21-ին:
Հիշեցնենք, որ Կենտրոն և Նորք-Մարաշ վարչական շրջանի ընդհանուր իրավասության Առաջին ատյանի դատարանի դատավոր Գագիկ Պողոսյանը Տիգրան Առաքելյանին դատապարտեց 6, Արտակ Կարապետյանին՝ 3, Սարգիս Գևորգյանին և Դավիթ Քիրամիջյանին՝ 2-ական տարվա ազատազրկման: Վերաքննիչ դատարանը տղաների բողոքը նոյեմբերի 13-ին մերժեց:
Ակտիվիստների փաստաբան Վահե Գրիգորյանը վճիռը բողոքարկեց Վճռաբեկ դատարանում, շուրջ մեկ ամիս սպասելուց հետո դատավորն այն ետ էր ուղարկել՝ պատճառաբանելով, թե չի հասկացվում՝ ուզում են տղաների պատիժը մեղմացնե՞լ, թե՞ արդարացնել: Լրացուցիչ բողոք ներկայացնելու համար փաստաբանն ուներ 20-օրյա ժամկետ. վերջինս այն ներկայացրեց փետրվարի 14-ին:
Նշենք, որ տղաների գործով անհանգստություն են հայտնել ինչպես հայկական մի շարք հասարակական, այնպես էլ Human Rights Watch միջազգային իրավապաշտպան կազմակերպությունը, որը Վճռաբեկ դատարանի նախագահ Արման Մկրտումյանին պաշտոնական նամակ էր ուղարկել՝ անհրաժեշտ համարելով այս գործի բոլոր դրույթների վերանայումը` Հայաստանի ստանձնած միջազգային պարտավորություններին համապատասխան:
Կազմակերպությունը խորը մտահոգություն է հայտնել առ այն, որ «մինչ ձերբակալությունն այս չորս երիտասարդների նկատմամբ արդյունավետ քննություն չի իրականացվել» և ոստիկանության բաժնում նրանք «դաժան վերաբերմունքի» են արժանացել, և Վճռաբեկ դատարանին հորդորել է լուրջ ուշադրություն դարձնել այդ պնդումներին:
Հիշեցնենք, որ ՀԱԿ ակտիվիստները մեղադրվում են 2011 թվականի օգոստոսի 9-ին Կարապի լճի հարակից տարածքում ոստիկանների հետ բախման, իշխանության ներկայացուցչի նկատմամբ ուժ գործադրելու, առողջությանը վնաս հասցնելու, խուլիգանության համար:
Երիտասարդներն իրենց մեղքը չեն ընդունում և պնդում են, որ իրականում ոստիկաններն են իրենց նկատմաբ ուժ գործադրել, սադրել բախումը: Ակտիվիստներից Տիգրան Առաքելյանն ավելի քան մեկուկես տարի գտնվում է անազատության մեջ: Եթե Վճռաբեկ դատարանը գործը վարույթ չընդունի, կկալանավորվեն նաև մյուս երեք տղաները:
