«Ֆուկուսիմա»-ի աղետի հետևանքները վերացնող ամերիկացի զինծառայողները պահանջում են ավելի քան 2 մլրդ դոլարի փոխհատուցում ԱԷԿ-ի սեփականատիրոջից, ով, նրանց կարծիքով, թաքցնում է իրենց առողջության համար աշխատանքների վտանգավորության աստիճանը։ Այս մասին հայտնում է Stars and Stripes թերթի ինտերնետ-պորտալը:
Ամերիկյան «Ռոնալդ Ռեյգան» ավիակրի անձնակազմը ներգրավված էր «Ֆուկուսիմա»-ի վթարի հետևանքների վերացման աշխատանքներում։
Երեկ ԱՄՆ ռազմածովային ուժերի 26 նավաստիներ ամերիկյան դատարան էին ներկայացրել Tokyo Electric Power Company (TEPCO) ընկերության դեմ հայց՝ պահանջելով իրենցից յուրաքանչյուրին վճարել 40 մլն դոլար՝ առողջությանը հասցված վնասի դիմաց, ինչպես նաև՝ 1 մլն դոլար դրամագլխով բուժման ծախսերի հիմնադրամ ստեղծել:
Ինչպես գրում է պարբերականը, Պենտագոնի ներկայացուցիչները պնդում են, որ աշխատանքների իրականացման շրջանում ռադիացիայի մակարդակը չի գերազանցել սահմանված նորմերը:
TEPCO-ի ղեկավարությունը հրաժարվել է մեկնաբանել իրավիճակը:
