«Ժառանգություն» խմբակցության ղեկավար Ստեփան Սաֆարյանը, անդրադառնալով Կարեն Դեմիրճյանի ծննդյան օրը Պանթեոնում Լևոն Տեր-Պետրոսյանի և Րաֆֆի Հովհաննիսյանի հանդիպմանն ու նրանց զրույցին, այսօրվա ասուլիսում ասաց, որ իրեն զրույցի բովանդակությունը քիչ է հետաքրքրում:
Սաֆարյանի խոսքերով, եթե այդ զրույցը քաղաքական տեսանկյունից կարևոր լիներ, Րաֆֆի Հովհաննիսյանը կուսակցության վարչության նիստ կհրավիրեր` ներկայացնելու զրույցի բովանդակությունը:
«Գոնե այս պահին որևէ ազդեցություն քաղաքական գործընթացների վրա չեմ ակնկալում»,- զրույցի վերաբերյալ ասաց նա:
Սաֆարյանի խոսքերով, ընդդիմության միավորման մասին զրույցները փողոցում, ոտքի վրա տեղի չեն ունենում:
«Ժառանգություն» խմբակցության ղեկավարը կարծում է, որ իրենց կուսակցության նախագահն առաջիկայում կուսակցությանը կներկայացնի այդ զրույցի բովանդակությունը:
