Ինչպես և սպասվում էր, Հայաստանի Սահմանադրական դատարանը մերժեց նախագահական ընտրությունները վիճարկող Րաֆֆի Հովհաննիսյանին և Անդրիաս Ղուկասյանին, որոնք նախագահի թեկնածուներ էին և ընտրություններից հետո դիմել էին դատարան: Սահմանադրական դատարանը որոշեց, որ նախագահական ընտրությունները օրինական են, սահմանադրական և ԿԸՀ որոշումը մնում է ուժի մեջ: Համաձայն այդ որոշման` ձայների 58 տոկոսով հաղթել է Սերժ Սարգսյանը, իսկ ձայների 37 տոկոսով երկրորդ տեղում է Րաֆֆի Հովհաննիսյանը: Ահա և վերջ, ինչպես ասում են: Ընտրությունների օրինականությունը, ընտրակեղծիքները վիճարկելու, այսպես ասած, իրավական ճանապարհները կարծեք թե սպառվեցին և այլևս մնում են միայն քաղաքական ճանապարհները, որոնցով պետք է գնա Րաֆֆի Հովհաննիսյանը:
Հովհաննիսյանը, ինչպես հայտնի է, ոչ միայն դիմել էր Սահմանադրական դատարան, այլ ընտրություններից հետո պարբերաբար հանրահավաքներ է անցկացնում, իսկ մարտի 10-ից էլ հայտարարել է հացադուլ` նշելով, որ Սերժ Սարգսյանը կերդվի միայն իր դիակի վրայով: Փաստորեն, Րաֆֆի Հովհաննիսյանին այսօր մնացել է միայն քաղաքական ճանապարհը: Հացադուլից բացի, ի±նչ քայլեր են սպասվում այստեղ: Սրանք առայժմ այնքան էլ պարզ չեն: Րաֆֆի Հովհաննիսյանը հայտարարել է այլընտրանքային կառավարություն ձևավորելու մտադրության մասին, սակայն այդ ուղղությամբ քայլեր դեռ չեն արվել: Միգուցե առաջին քայլերը կլինեն այսօր կայանալիք հանրահավաքի ընթացքում, կամ այդ ընթացքում կլինեն հայտարարություններ առաջին քայլերի ժամանակացույցի և բնույթի մասին:
Այսպես, թե այնպես, Րաֆֆի Հովհաննիսյանն, իհարկե, պետք է պատրաստ լիներ ՍԴ այս որոշմանը, և նրա համար անակնկալ ոչինչ չպետք է լինի, հետևաբար չպետք է լինի հընթացս որոշումների անհրաժեշտություն, այլ ընդամենը պետք է անցնել նախապես պլանավորած հաջորդ քայլին: Առանցքայինն առայժմ շարունակում է մնալ Րաֆֆի Հովհաննիսյանի հացադուլը, որն իհարկե ակնհայտորեն ոչ կոմֆորտ վիճակ է ստեղծել իշխանությունների համար: Ակնհայտ է, որ Սահմանադրական դատարանի որոշումով իրավիճակը ոչ միայն չի հանգուցալուծվում, այլ գուցե նույնիսկ առավել ցցուն է դառնում քաղաքական խնդիրը: Միգուցե իշխանությունները հանելով հարցի իրավական կողմը՝ ՍԴ որոշմամբ, կփորձեն իրավիճակը հանգուցալուծել քաղաքական բանակցությունների, թեև հնարավոր է նաև պարզապես բանսարկությունների միջոցով:
Իսկ Սահմանադրական դատարանի որոշումը չանցավ առանց որևէ հետաքրքրական մեսիջի: Դատարանը անվավեր էր ճանաչել Արտաշատի թիվ 17/05 ընտրատարածքի ընտրության արդյունքները: Սա ակնհայտորեն հարված է ՀՀԿ նախընտրական շտաբի պետ, ԱԺ խոսնակ Հովիկ Աբրահամյանին, որի հայրենի բնօրրանն է Արտաշատը: Փաստորեն, ՍԴ-ի մակարդակով այդ բնօրրանը «երկուս», իսկ գուցե նույնիսկ «մեկ» է ստանում ընտրությունների համար: Իրականում այդ «մեկը» ստանում է Հովիկ Աբրահամյանը և ըստ էության` ոչ միայն 17/05-ի կամ միայն Արտաշատի, այլ պարզապես ի դեմս դրա ընդհանուր ընտրական պրոցեսի համար, որը հայաստանյան նախագահական ընտրությունների պատմության մեջ երևի թե ամենավատն էր իշխանության թեկնածուների կամպանիաների շարքում:
Սերժ Սարգսյանի զայրույթը սույն կապակցությամբ, ամենայն հավանականությամբ, բավական մեծ է, եթե նա որոշել է այն արտահայտել մինչև անգամ Սահմանադրական դատարանի մակարդակով` երևի Հովիկ Աբրահամյանին հասկացնելով, որ խոսքը այս անգամ ոչ թե նկատողության, այլ դատավճռի մասին է:
