Երեկ՝ ՀՀ կառավարության հերթական նիստի ավարտից որոշ ժամանակ անց կառավարություն եկավ ՀՀ պետական եկամուտների կոմիտեի նախագահ Գագիկ Խաչատրյանը (Տամոժնի Գագոն): Նա գնաց վարչապետ Տիգրան Սարգսյանի հետ հանդիպելու:
«Ժողովուրդ»-ի թղթակիցը նկատեց, թե ինչպես է գործադիրի շենք մտնելուց առաջ Խաչատրյանի օգնականը նրան փոխանցում ինչ-որ գունավոր թղթիկներ, որոնք վերցնելուն պես Խաչատրյանն արագ քայլերով բարձրացել է վեր: Մեկ ժամից ավելի նա մնացել է վարչապետի աշխատասենյակում:
Թերթը փորձեց պետական եկամուտների կոմիտեի հասարակայնության հետ կապերի և լրատվության ծառայության ղեկավար Նելլի Մանուչարյանից պարզել, թե Խաչատրյանն ինչ նպատակով է հանդիպել վարչապետի հետ և ինչ զրույց է ունեցել: Մամլո խոսնակն ընդամենն ասաց, թե դա նախապես ծրագրված աշխատանքային հանդիպում է եղել:
