Իսրայելի ռազմական հետախուզության ղեկավար գեներալ-մայոր Ավիվ Կոխավին հայտարարել է, որ Սիրիան պատրաստվում է քիմիական զենք կիրառել: Ինչպես հաղորդում է «Հաարեց» թերթը, գեներալը նշել է, որ քիմիական զենքի կիրառման վերաբերյալ վերջնական ցուցումներ Դամասկոսը դեռ չի տվել:
2012թ. դեկտեմբներին, երբ տեղեկություններ տարածվեցին, որ Սիրիայի վարչակարգը քիմիական զենք է կիրառում, Իսրայելը հայտարարեց, որ իր տրամադրության տակ այդպիսի տեղեկություն չկա, չնայած իրենք ուշիուշով հետևում են այդ երկրում իրադարձությունների ընթացքին:
Կոխավին, սակայն, հայտարարել է, որ Բաշար Ալ-Ասադի վարչակարգը ապստամբների և խաղաղ բնակիչների դեմ կիրառում է գնալով ավելի ուժեղ զենք: Մասնավորապես, Իսրայելը հաշվել է միջին հեռավորության առնվազն 70 բալիստիկ հրթիռի արձակում Սիրիայի ներսում: Կոխավին նշել է, որ Սիրիան այլևս չի կարելի ընկալել որպես միասնական պետություն, քանի որ այդ երկրի մեծ մասը չի վերահսկվում կենտրոնական իշխանության կողմից:
Իսրայելի ռազմական հետախուզության տվյալներով՝ Իրանը և «Հըզբոլլահ»-ը վերջին ամիսներին զգալիորեն ուժեղացրել են Դամասկոսին հատկացվող օգնությունը: Իրանը իր դաշնակցին օգնում է զենքով և գումարով, իսկ Լիբանանի շիաները ուղարկում են իրենց հատուկ ստորաբաժանումները, որոնք պայքարում են Սիրիայի կառավարական ուժերի կողքին: Կոխավին պատմել է, որ արդեն հիմա Ասադի զորքերի կողքին ոչ պաշտոնապես կռվում են հարյուրավոր «Հըզբոլլահ»-ի անդամներ: Նրա խոսքով՝ այդ մարդկանց ներկայությունը Սիրիայում չի բարձրաձայնվում, իսկ զոհվելու դեպքում նրանց հուղարկավորում են կեղծ անուններով:
Գեներալը նշել է, որ Ասադի կողքին այժմ կռվում է այսպես կոչված «Սիրիայի ժողովրդական բանակը», որի մեջ մտնում են քաղաքացիական անձինք: Ըստ նրա՝ այդ բանակի թիվը կազմում է 50 հազար մարդ: «Ժողովրդական» բանակի զինվորներին պատրաստում են «Հըզբոլլահ»-ի հրահանգիչները, որոնց վճարում է Իրանը:
