Iberia ավիաընկերության աշխատակիցների արհմիությունները ընդունել են միջնորդ Գրեգորիո Տուդելայի առաջարկը և որոշել են դադարեցնել գործադուլը: Այս մասին հայտնում է EFE գործակալությունը:
Վեց առաջատար արհմիությունները, որոնք ներկայացնում են ավիաընկերության աշխատակազմի 93 տոկոսը, ստորագրել են համաձայագիր, համաձայն որի՝ նախկինում ծրագրված գործադուլների երրորդ ալիքը (մարտի 18-22-ը) չեղյալ կհայտարարվի:
Միջնորդի պլանի համաձայն՝ ծրագրվում է հեռացնել մինչև 3141 աշխատակցի, 7 տոկոսով իջեցնել ցամաքային ծառայությունների աշխատակիցների և 14 տոկոսով էլ թռիչք իրականացնող անձնակազմի անդամների աշխատավարձերը, ինչպես նաև սառեցնել աշխատավարձերը մինչև 2015 թվականը: Ավելի վաղ Iberia-ն հայտնել էր ավելի քան 3147 աշխատակցի հեռացման , 11 տոկոսով ցամաքային ծառայությունների աշխատակցիների և 23 տոկոսվ թռիչք իրականացնող անձնակազմերի անդամների աշխատավարձերի կրճատման անհրաժեշտության մասին: Ավիաընկերության ղեկավարությունը միջնորդի պլանն ընդունել է դեռևս կիրակի:
Օդաչուների Sepla արհմիության անդամները դեռևս հրաժարվել են ստորագրել համաձայնագիրը: Արհմիության ներկայացուցչի խոսքերով՝ Տուդելայի պլանում ապագայի երաշխիքներն անբավարար են, բացի այդ, համաձայնագրում օդաչուների մասին հոգ են տարել ավելի քիչ, քան մյուս աշխատակիցների: Չնայած դրան, օդաչուների արհմիությունը միացել է գործադուլների երրորդ ալիքի կասեցման վերաբերյալ մյուս արհմիությունների որոշմանը:
Գործադուլների երկու ալիքները տեղի են ունեցել փետրվարի 18-22-ը և մարտի 4-8-ը:
