ՀՀ-ում մարտի 15-17-ը սպասվում է ջերմաստիճանի կտրուկ բարձրացում: Այսօր լրագրողների հետ հանդիպմանը ՀՀ ԱԻՆ Հիդրոմետ ծառայության օդերևութաբանության կենտրոնի պետի տեղակալ Գագիկ Սուրենյանն ասաց, որ այդ օրերին հանրապետության տարածքը կգտնվի Աֆրիկայի հյուսիսային շրջաններից սկիզբ առած հզոր տաք օդի ալիքի ազդեցության գոտում, որի արդյունքում կդիտվի ջերմաստիճանի կտրուկ բարձրացում. մարտի 12-ի համեմատ՝ 8-10 աստիճանով. «Օդի ջերմաստիճանի կտրուկ բարձրացման պատճառով պետք չէ խուճապի մատնվել։ Մենք ամեն ինչ անում ենք, որ ջերմաստիճանի բարձրացումը որևէ վնաս չհասցնի հանրապետությանը»:
ՀՀ ԱԻՆ ՓԾ բնակչության պաշտպանության և աղետների հետևանքների վերացման կազմակերպման վարչության պետ, գնդապետ Հովհաննես Եմիշյանը, պատասխանելով «Առաջին լրատվական»-ի այն հարցին, թե ինչ, կանխարգելիչ միջոցառումներ են նախատեսվում, ասաց, որ բոլոր պետական գերատեսչությունները միասին իրականացնում են դրանք,և եթե ինչ-որ նոր փոփոխություն լինի, ապա նախօրոք բնակչությանը կտեղեկացվի: Նա նշեց, որ ջրհավաք ավազանները պատրաստ են ընդունելու ձյան հալոցքները: Ներկայումս ՀՀ-ում ձնածածկույթ առկա է հատկապես Շիրակի, Կոտայքի, Արագածոտնի և Վայոց Ձորի մարզերում:
ՓԾ տնօրենի տեղակալ, գնդապետ Նիկոլայ Գրիգորյանն էլ ասուլիսի ընթացքում հավելեց, որ մարտի 18-ին սպասվող տեղումները կարագացնեն բարձր ջերմաստիճանի արդյունքում կիսահալված վիճակում գտնվող ձյան հալոցքը, որի հետևանքով հնարավոր է ափամերձ տարածքների և բնակավայրերի ջրածածկում: Նա ևս մեկ անգամ շեշտեց խուճապի չմատնվել, ԱԻՆ-ն առավելագույնը կանի, որպեսզի խուսափենք դժբախտ պատահարներից:
Հիշեցնենք, որ ՀՀ-ում նմանատիպ երևույթ դիտվել է 2004 թվականի մարտի 5-6-ն ընկած ժամանակահատվածում, երբ ձյան շերտի բարձրությունը 2-3 անգամ ավելի փոքր էր, քան հիմա:
