ԱՄՆ նախագահ Բարաք Օբաման ամերիկացի օդաչուներին առաջարկել է խորհրդակցել Բրունեյի սուլթան Հասանալ Բոլկիահի հետ՝ նշելով, որ նա Վաշինգտոն հանդիպման է եկել՝ անձամբ վարելով իրեն պատկանող Boeing 747 օդանավը: Այս մասին հայտնում է Reuters գործակալությունը:
«Կարծում եմ՝ նա հավանաբար աշխարհում միակ պետության ղեկավարն է, որն ինքնուրույն է վարում 747-ը,- նշել է Օբաման:- Եթե թիվ մեկ օդանավի հետ խնդիրներ լինեն, մենք գիտենք ում հետ խորհրդակցել»,- ասել է նա:
Որպես ամերիկյան «թիվ մեկ օդանավ», որով թռչում է ԱՄՆ նախագահը, որպես կանոն՝ կիրառվոմ է Boeing 747-ի հատուկ ռազմական տարբերակը՝ Boeing VC-25-ը:
Բացի այդ, Օբաման սուլթանի հետ հանդիպմանը թույլ է տվել իրեն կատակել նրա հարստության առնչությամբ՝ նշելով, որ Բոլկիահը ծրագրում է ընտանիքով Նյու Յորք այցելել: Նա հայտարարել է. «Մենք պատրաստվում ենք համոզել նրան զբաղվել շոփինգով, քանի որ ցանկանում ենք շարունակել ամրապնդել ԱՄՆ տնտեսությունը»:
Հասանալ Բոլկիահը նավթով հարուստ Բրունեյը ղեկավարում է 1967 թվականից: Նրա կարողությունը 2011 թվականին Forbes ամսագրի կողմից գնահատվել է 20 միլիարդ դոլար:
