Լիբանանի հարավում գտնվող Սայդա քաղաքում տեղակայված Այն Ալ-Հիլվա փախստականների ճամբարում դաժան բախումներ են սկսվել ինքնապաշտպանության պաղեստինյան ուժերի և իսլամիստների միջև:
Ինչպես հաղորդում է ITAR-TASS-ը՝ վկայակոչելով «Ալ-Վատանիյա» տեղեկատվական գործակալությունը, կողմերը խիտ բնակեցված թաղամասերում կիրառում են հրազենային զենք և նռնականետ: Խաղաղ բնակիչների շրջանում կան վիրավորներ, հիվանդանոց է տեղափոխվել 11 մարդ:
Հրաձգությունը սկսվել է «Իսլամական ՖԱԹՀ» ընդհատակյա ծայրահեղական խմբավորման առաջնորդներից մեկի՝ Բիլյալ Բադրայի և նրան ուղեկցող երկու գրոհայինների սպանությունից հետո: Ի պատասխան իսլամիստները հարձակվել են Պաղեստինի ազատագրման ազգային ճակատի շտաբի վրա: Թաղամասը, որտեղ այժմ թաքնվում են գրոհայինները, շրջափակված է:
Կրոնական հեղինակությունները կողմերին փորձում են համոզել դադարեցնել կրակը:
Լիբանանցի զինծառայողները չեն միջամտում, սակայն ուժեղացրել են իրենց դիրքերը՝ ձգտելով թույլ չտալ, որպեսզի ճամբարից գրոհայինները ներխուժեն քաղաք:
