Մոտ ապագայում Իսրայելին պատերազմ չի սպառնում, սակայն իրավիճակի «վատթարացման մեծ հավանականություն կա»: Ինչպես հաղորդում է ITAR-TASS-ը, այս մասին հայտարարել է Իսրայելի բանակի գլխավոր շտաբի պետ, գեներալ Բենի Գանցը անվտանության հարցերով Հերցլիի համաժողովում ելույթ ունենալու ժամանակ:
Նա նշել է, որ Սիրիայում իրվաիճակն անկայուն է, վտանգավոր, և, չնայած ահաբեկչական կազմակերպությունները դեռևս պատերազմում են Սիրիայի նախագահ Բաշար Ալ-Ասադի ուժերի դեմ, Իսրայելը «հաջորդն է հերթում»:
Գանցի խոսքերով՝ Իսրայելը նրանց հաջորդ թիրախն է, և ռազմավարական առավելությունները, որոնք ունի Սիրիան, կարող են անցնել այդ կազմակերպությունների ձեռքը: Նա նշել է, որ եթե նման բան տեղի ունենա, ապա մեծ հավանականություն կա, որ այդ կազմերպությունները դրանք կարող են կիրառել Իսրայելի դեմ:
Խոսելով Լիբանանի հետ սահմանին տիրող իրավիճակից՝ գեներալը նշել է, որ վերջին յոթ տարիները «բավական հանգիստ են» եղել: «Ես հույս ունեմ, որ այդ հանգստությունը կպահպանվի, սակայն եթե այդպես չլինի, մենք գիտենք անհրաժեշտ ուժով ինչպես գործել անմիջապես «Հըզբոլլահ»-ի և պետության դեմ, որտեղ այն գտնվում է: Լիբանանը, լինելով հարևան երկիր, չի կարող միաժամանակ լինել և՛ ինքնիշխան, և՛ անպատասխանատու: Եթե դա տեղի ունենա, ես կնախընտրեի լինել Իսրայելի, այլ ոչ թե Լիբանանի քաղաքացի»,- հավելել է գեներալը:
Անդրադառնալով Գազայի հատվածում տիրող իրավիճակին՝ Գանցը կոչ է արել տարբերակել ՀԱՄԱՍ շարժման ռազմական հայտարարությունները և այն, թե ինչ է շարժումն անում իրականում:
Գեներալը նշել է, որ Եգիպտոսի հետ սահմանի վրա տասնամյակներ շարունակ տիրում էր հանգիստ վիճակ, սակայն այժմ «իրավիճակը գտնվում է շարժման մեջ», և նշել է, որ Իսրայելը կանի ամեն ինչ այս շրջանում հանգստություն պահպանելու համար, սակայն պետք է հասկանալ, որ այն գտնվում է փոփոխությունների գործընթացում:
