Հայտնի դերասան Լեոնարդո Դի Կապրիոն ավելի քան 40 մլն եվրո է հավաքել՝ հաջակցություն վայրի բնության պաշտպանության՝ իր կողմից ստեղծված հիմնադրամի գործունեության: Իր գլխավորած կազմակերպությունը հայտնել է, որ բոլոր միջոցները ստացվել են բարեգործական երեկոյի ընթացքում, որն անցկացվել է չորեքշաբթի ֆրանսիական Սեն-Տրոպե քաղաքում: Այս մասին հայտնում է TASS-ը:
Երեկոյի ժամանակ դերասանն աճուրդ է կազմակերպել, որի ընթացքում վաճառել է ժամանակակից գեղանկարչության՝ իրեն պատկանող թանկարժեք ստեղծագործություններ, այդ թվում՝ Էնդի Ուորհոլի և բրիտանացի փողոցային նկարիչ Բենքսիի նկարները: Դի Կապրիոն նաև ամերիկացի գործարար Թոմ Բարաքին է վաճառել անշարժ գույքի մի մասը Բլեքադոր Քեյ կղզում, որի սեփականատերն է դերասանը:
Սեն-Տրոպեում 1 մլն եվրոյով վաճառվել է պայմանագիր, որի սեփականատերը թույլտվություն է ստանում համաշխարհային խոշորագույն կինոփառատոներում ուղեկցելու հայտնի պրոդյուսեր Հարվի Վայնսթայնին:
2.73 մլն եվրոյով ձեռք է բերվել Էլթոն Ջոնի մասնավոր համերգ անցկացնելու իրավունքը:
Իր հայտարարության մեջ Լեոնարդո Դի Կապրիոն նշել է. «Ես հպարտ եմ, որ մասնակցել եմ բարեգործական երեկույթին, որի միջոցները հնարավորություն կտան շատ օգտակար նախաձեռնություններ ձեռնարկել մոլորակի պաշտպանության համար»:
Միջոցառմանը մասնակցել են նաև Մոնակոյի իշխան Ալբեր II-ը, ֆրանսիացի հայտնի դերասանուհի Մարիոն Կոտիյարը, ամերիկացի դերասանուհի Քեյթ Հադսոնը:
