Ստամբուլի «Ժամանակ» օրաթերթի գլխավոր խմբագիր Արա Գոչունյանի փոխանցմամբ` նախընտրական արշավում քաղաքական կուսակցությունների ներկայացրած ծրագրերը ունեն մեկ ընդհանրություն. դրանցում առանցքային է հանրապետության հարյուրամյակը տոնելու ծրագիրը: «2023թ.-ին Թուրքիան նշելու է hանրապետության հիմնադրման 100-ամյակը և արդեն հիմա կուսակցությունները իրենց ծրագրերը ներկայացնում են այդ հեռանկարից, թեև ավելի քան տասը տարի կա առջևում: Ընդհանուր առմամբ նախընտրական արշավը ընթանում է նորմալ հունով, ներկայացվում են ծրագրերը, որոնց շուրջ ծավալվում են թեժ քննարկումներ»,- մեզ հետ զրույցում ասում է Արա Գոչունյանը:
Արա Գոչունյանի խոսքով` նախընտրական արշավում շարունակում է ֆավորիտ մնալ վարչապետ Ռեջեփ Թայիփ Էրդողանի «Արդարություն եւ զարգացում» կուսակցությունը: Մեծ են նաև «Ժողովրդահանրապետական», «Ազգայնական շարժում» եւ «Խաղաղության եւ ժողովրդավարություն» կուսակցությունները:
«Արդարություն և զարգացում» կուսակցությունը արդեն 10 տարի է իշխանության ղեկին է և մեծ հավանականություն ունի անենաշատ ձայներ հավաքելու գալիք ընտրություններում և երրորդ անգամ կառավարության կազմելու: Ուստի նա կարիք չունի որևէ փոփոխություն մտցնել իր մարտավարության մեջ: Կարելի է ենթադրել, որ թուրքական քաղաքականությունը էապես չի փոխվի ընտրություններից հետո»,-ասում է Արա Գոչունյանը:
Հիշեցնենք, որ Թուրքիայում խորհրդարանական ընտրությունները տեղի են ունենալու հունիսի 12-ին: