Հարվարդի համալսարանի ղեկավարները գաղտնի կարդացել են աշխատակիցների էլեկտրոնային նամակները՝ պարզելու համար, թե մամուլին ով է բացահայտել սկանդալի մասին ներքին տեղեկատվությունը, որն առնչվում էր 2012թ. ամռանը քննության ժամանակ ուսանողների զանգվածային արտագրության հետ: Այս մասին հաղորդում է The New York Times-ը:
2012թ. աշնանը ծածուկ ստուգվել է Հարվարդի ֆակուլտետների 16 դեկանների ծառայողական փոստը: Նրանք նաև հանդիսացել են հանձնաժողովի անդամ, որը հետաքննություն է անցկացրել արտագրման փաստով, հաղորդում է Associated Press-ը: Հետագայում միայն նրանցից մեկին են հայտնել հետևելու մասին:
Համալսարանի ղեկավարությունն այս կերպ փորձել է պարզել, թե ով է մամուլին փոխանցել ծառայողական գրառումը, որում խոսվել է արտագրող ուսանողներին պատժելու մասին: Հարվարդի որոշ աշխատակիցների խոսքերով՝ իրենց ուղղակիորեն չեն հարցրել արտահոսքի մասին:
Հարվարդի համալսարանում արտագրության հետ կապված մեծ աղմուկ բարձրացրած դեպքը տեղի է ունեցել 2012թ. օգոստոսին: Այդ ժամանակ պարզվել էր, որ «Կոնգրեսի աշխատանքի հիմքերը» առարկայի քննության ժամանակ շուրջ 125 ուսանող օգնել են միմյանց: 2013թ. փետրվարին շուրջ 60 ուսանողներ հեռացվեցին համալսարանից, իսկ մյուսները պատժվեցին:
Հիշեցնենք, որ Times Higher Education World Reputation Rankings-ի բարձրագույն ուսումնական հաստատությունների վարկանիշում Հարվարդի համալսարանը զբաղեցրել է առաջին հորիզոնականը: