Մալաթիայի գյուղատնտեսական ապրանքների շուկայում այլևս աժիոտաժ չկա, առևտրականները ազատ տեղ գտնելու համար չեն վիճում, անգամ ազատ տաղավարներ կան: «Առաջին լրատվական»-ի հետ զրույցում առևտրականները նշեցին, որ դա մի քանի պատճառ ունի, որոնցից առաջինը արտագաղթն է:
«Առևտուր չկա, երկիրը դատարկվում է, առևտրականներն էլ փախնում են, մարդկանց ձեռը փող չկա»,- նշեցին իրենց ապրանքը իրացնող գյուղացիներն ու վերավաճառողները: Նրանց խոսքով՝ այսպիսի իրավիճակում շատ առևտրականների նյարդերը տեղի են տալիս ու ապրանքը վաճառում են կոպեկներով: «Գյուղերից ենք գալիս, ստացած գումարի մի մասը տրանսպորտին ենք տալիս, իսկ առևտուրը խայտառակ նվազել է, կանգնելով էլ չի լինում»,- նշեցին նրանք:
«Առաջին լրատվական»-ը նկարահանման ժամանակ ականատես եղավ, թե ինչպես է գյուղացին սմբուկը վաճառում մեկ կգ-ը 20 դրամով. «Մեշոկը 1000 դրամ եմ տալիս, եկեք տարեք, գնամ»,- գնորդներին համոզում էր նա: Նույն շուկայում սմբուկի 1 կգ-ը 60-80 դրամ էր:
Թե գյուղացիները և թե վերավաճառողները պնդեցին, որ երբ նյարդերը տեղի են տալիս և կանգնում են ապրանքը փչանալու փաստի առաջ, հաճախ են այսպիսի ակցիաների դիմում:
Գնորդները մեզ հետ զրույցում նշեցին, որ իրենց համար էլ է դժվար, եթե անգամ մատչելի են գները՝ սակարկում են, բայց հասկանում են, որ կոնկրետ գյուղացիների համար ավելի դժվար է. «Մեզ համար էժան է, իրենց հարմար չէ, ծախսեր են արել մինչ բերքը շուկա կհասնի»,- նշեցին նրանք:
Մանրամասները ՝ տեսանյութում:
