Հայաստանի ազգային հավաքականի հարձակվող Յուրա Մովսիսյանն իր նոր ակումբի` Մոսկվայի «Սպարտակ»-ի կազմում մեկնարկային խաղում հեթ-տրիկի հեղինակ դարձավ: Յուրան հարցազրույց է տվել ակումբի պաշտոնական կայքին:
-Յուրա´, շնորհավորում ենք Ձեզ փայլուն մեկնարկի կապակցությամբ: Սպասու՞մ էիք, որ ակումբի կազմում Ձեր առաջին խաղը նման կերպ կդասավորվի:
-Շնորհակալություն: Իսկապես, ակումբում իմ առաջին պաշտոնական խաղը հիանալի էր: Բայց ամենակարևորն այն է, որ մենք հաղթանակ տարանք: Այս հաղթանակը կարևոր էր մեզ համար, քանի որ հակառակորդը թույլ չէր:
-«Թերեք»-ի դարպասը խփած 3 գոլերից ո՞րը կառանձնացնեք:
-Դժվար է առանձնացնել որևէ մեկը, քանի որ 3 գոլերն էլ կարևոր են ինձ համար: Հավանաբար, երկրոդ գոլն ավելի գեղեցիկ էր, քան մյուսները: Կարևորը հաղթանակն է: Ամբողջ թիմը խաղադաշտում ներդրեց ողջ ուժերը և պայքարեց մինչև վերջին րոպեն: Լավ խաղ անցկացրինք և անհրաժեշտ արդյունքի հասանք:
-Ինչպիսի՞ մթնոլորտ է «Լուժնիկի»-ում:
-Ֆանտաստիկ: Առաջին անգամ զգացի «Սպարտակ»-ի երկրպագուների աջակցությունը: Դա յուրահատուկ է:
-Հաճախակի էիք նահանջում ու օգնում պաշտպաններին: Դա մարզչի՞ հրահանգն էր:
-Իհարկե: Պաշտպանությունը սկսվում է հարձակման գծից: Հարձակվում և պաշտպանվում է ամբողջ թիմը:
-Ու՞մ եք նվիրում այդ հեթ-տրիկը:
-Ընտանիքիս անդամներին: Բոլոր նրանց, ովքեր հավատում և սատարում էին ինձ:
