Չավուշօղլուն չարաշահել է իր պաշտոնեական դիրքը

ԵԽԽՎ գարնանային նստաշրջանում տեղի ունեցած միջադեպերի մասին (մասնավորապես` Չավուշօղլուի և Դավութօղլուի հետ կապված) այսօր լրագրողներին պատմեց ԵԽԽՎ հայաստանյան պատվիրակության անդամ Զարուհի Փոստանջյանը: Նա տեղեկացրեց, որ ԵԽԽՎ նախագահ Մևլութ Չավուշօղլուն, չարաշահելով իր պաշտոնեական դիրքը, խոչընդոտել է ԵԽԽՎ-ում Հայաստանի պատվիրակության անդամների ելույթ ունենալուն, և ընդգծեց, որ ժամանակին ինքը կոչ էր անում հայաստանյան պատվիրակության անդամներին պայքարել և թույլ չտալ, որ Չավուշօղլուն դառնա ԵԽԽՎ նախագահ, սակայն իր կոչին որևէ մեկը չմիացավ, և այսօր բոլորը քաղում են այդ ամենի պտուղները:
Փոստանջյանը տեղեկացրեց, որ ինքն ու ՀՀ պատվիրակության այլ անդամներ հերթագրվել են, որպեսզի հարցեր տան Թուրքիայի վարչապետ Ռեջեփ Թայիփ Էրդողանին, սակայն ԵԽԽՎ ազգությամբ թուրք նախագահը հայ պատգամավորների ելույթ ունենալու հերթը կանխամտածված հետաձգել է, որպեսզի կանխի ՀՀ պատվիրակության կողմից Թուրքիայի վարչապետին անցանկալի հարցեր տալը: Հայաստանի պատվիրակության հարցում-նամակին ԵԽԽՎ քարտուղարությունից պատասխանել են, որ հարց տալու հերթականության խախտումը եղել է ԵԽԽՎ կանոնակարգի շրջանակում: Էրդողանին հարց կարողացել է տալ միայն Արմեն Ռուստամյանը. «Իհարկե, բոլորիս համար պարզ էր, որ դա ոչ թե կանոնակարգի կետի կատարում է եղել, այլ Չավուշօղլուն չարաշահել է իր պաշտոնեական դիրքը»:
Այդուամենայնիվ, Փոստանջյանը Թուրքիայի ԱԳ նախարար Ահմեդ Դավութօղլուին հարցրել է, թե ե՞րբ է Թուրքիան պատրաստվում առերեսվել պատմական իրականության հետ, որի առաջին քայլերից մեկը կլինի Հայոց ցեղասպանության ճանաչումը և թուրքական քրեական օրենսգրքից 301 հոդվածի վերացումը, ինչին ի պատասխան Դավութօղլուն Փոստանջյանին խորհուրդ է տվել «սովորել միջազգային իրավունքը» և պատմական հարցերը քննարկել պատմաբանների հանձնաժողովում:
Փոստանջյանը նշեց, որ նույնկերպ են պատասխանում նաև Հայաստանի իշխանությունները և հիշեցրեց, թե ինչպես 2007թ. այն ժամանակ վարչապետ Սերժ Սարգսյանին ինքը հարցրել է` չի՞ կարծում, որ ԸՕ-ն խախտելով չի կարող ընտրված նախագահ լինել, ինչին ի պատասխան Սերժ Սարգսյանը խորհուրդ է տվել «լիկբեզ անցնել» և ավելի ճիշտ կլինի դիմի Դավիթ Հարությունյանին. «Լիկբեզը խորհրդային տարիներից է եկել. պարոն Սարգսյանի ծնողներն էլ են լիկբեզ անցել, ու հենց ինքն է իր հարցազրույցներից մեկում ասել, որ իր ծնողները անգրագետ են եղել և լիկբեզ են անցել»: