Ավստրիայի բնակիչների ավելի քան 60%-ը կցանկանար, որ իր երկիրը ղեկավարեր բռնապետ, այս մասին են վկայում ավստրիական Standard ամսագրի պատվերով Լինցկի Շուկայի ինստիտուտի կատարած հարցման արդյունքները:
Ինչպես գրում է պարբերականը, հարցումն անցկացվել է այս շաբաթ, դրան մասնակցել է ընտրության իրավունք ունեցող Ավստրիայի 502 քաղաքացի:
Գլխավոր հարցերից մեկը եղել է այն, թե ժամանակակից ավստրիացիներն ինչպես են գնահատում նացիստական կուսակցության՝ հաղթելու հիպոթետիկ շանսերը, եթե նրանց թույլատրվի մասնակցել Ավստրիայի խորհրդարանի ազատ ընտրություններին:
Հարցումը ցույց է տվել, որ երկրի քաղաքացիների կեսից ավելին՝ 54%-ը, կարծում է, որ միանգամայն հավանական է նացիստների հաղթանակը ընտրություններում, եթե պատկերացնենք, որ ազգայնա-սոցիալիստական գաղափարախոսության վրա դրված արգելքը չեղյալ հայտարարվի: Ընդ որում՝ հարցվածների 13%-ը հայտարարել է, որ նման արգելքը չափից ավելի խիստ սահմանափակում է:
Բացի այդ՝ Ավստրիայի բնակիչների 61%-ը ցանկություն է հայտնել երկրի ղեկավարի դերում տեսնել «ամուր բռունցք»: Բռնապետության կողմնակիցների թվում եղել են հիմնականում տարեց ավստրիացիները, գրում է Standard-ը:
Ինչպես նկատում է ամսագիրը, հարցումը ցույց է տվել, որ Ավստրիայի բնակիչների շրջանում վերջին մի քանի տարում նկատվել է ուլտրաաջ տրամադրությունների աճ: