17 ժամ բանակցություններից հետո Հունաստանի վերաբերյալ համաձայնությունը ձեռք է բերվել: TASS-ի հաղորդմամբ՝ այս մասին հայտարարել է Եվրոպական խորհրդի նախագահ Դոնալդ Տուսկը:
Նրա խոսքով՝ Եվրախումբն անցնում է Հունաստանի համար բրիջ-վարկի պայմանների պատրաստմանը:
«Ֆինանսների նախարարները շտապ կարգով կքննարկեն՝ ինչպես կարճաժամկետ հեռանկարում բավարարել Հունաստանի ֆինանսական պահանջմունքները, այսպես կոչված՝ բրիջ-ֆինանսավորում անել»,- ասել է Տուսկը:
Նրա խոսքով՝ Հունաստանին օգնության ծրագիրը կիրականացվի բարեփոխումների անցկացման խիստ պայմաններով:
Եվրահանձնաժողովի նախագահ Ժան-Կլոդ Յունկերը հայտնել է, որ Եվրահանձնաժողովը կապահովի Հունաստանի տնտեսության ներդրումը 35 մլրդ եվրո մակարդակի վրա: «Եվրահանձնաժողովը բավարարված է, որ կկարողանա ներդրումների ապահովման մասին իր նախագիծն իրականացնել Հունաստանի իրական տնտեսության մեջ 35 մլրդ եվրո մակարդակի վրա»,- ասել է Յունկերը:
«Եվրոգոտուց Հունաստանը դուր չի գա»,- հայտարարել է նա:
Եվրոգոտու գագաթնաժողովի ժամանակ Հունաստանի հարցով ձեռք բերված համաձայնագիրն այդ երկրին հնարավորություն կտա մնալ եվրոպական արժութային միությունում: Բելգիայի մայրաքաղաքում բանակցությունների արդյունքներով այսպիսի հայտարարությամբ է հանդես եկել Ֆրանսիայի նախագահ Ֆրանսուա Օլանդը:
«Այդ համաձայնագիրը Հունաստանին հնարավորություն է տալիս մնալ եվրոգոտում ԵՄ կանոնների պահպանման պայմանով»,- ասել է նա՝ ամփոփելով բրյուսելյան հանդիպման արդյունքները:
Օլանդի խոսքով՝ եվրոպացի ղեկավարներին հաջողվել է հասնել բանակցությունների գլխավոր նպատակին՝ «պահպանել եվրոգոտու միասնությունը, ամբողջականությունը և համերաշխությունը»: Նպատական էր նաև Հունաստանին և հույն ժողովրդին հույս տալը»,- հավելել է Օլանդը:
Նա նաև հայտնել է, որ Հունաստանի կառավարությունը առաջիկա ժամերին պետք է արտահերթ նիստի հավաքվի բարեփոխումների վերաբերյալ քվեարկություն անցկացնելու համար եվրոգոտու գագաթնաժողովում ձեռք բերված պայմանավորվածությունների համաձայն:
Օլանդի խոսքով՝ մոտ ժամանակներս այդ հարցով քննարկումներ տեղի կունենան նաև եվրոգոտու երկրների այլ խորհրդարաններում: «Ազգային խորհրդարանները ևս նիստեր կանցկացնեն: Ֆրանսիայում Ազգային ժողովը եվրոգոտու գագաթնաժողովի վերջնական հռչակագրի վերաբերյալ կքվեարկի չորեքշաբթի օրը»,- ասել է Ֆրանսիայի նախագահը:
Դրանից հետո, հավելել է Օլանդը, կսկսվի Հունաստանին օգնության նոր ծրագրի հետ կապված «բանակցային շրջանը»: «Առաջիկա օրերին, հնարավոր է՝ շաբաթներին, կընթանան այդ բանակցությունները, և դրանց ժամանակ անհրաժեշտ կլինի ֆինանսավորում ապահովել (Հունաստանին)»,- նշել է նա:
