Հինգշաբթի օրը Լոնդոն քաղաքի բնակիչները և զբոսաշրջիկները ստիպված կլինեն ամբողջ օրը մնալ առանց մետրոյի: Բանն այն է, որ չորեքշաբթի երեկոյան այնտեղ սկսվել է մետրոյի աշխատակիցների՝ մի քանի տարվա մեջ ամենամասշտաբային գործադուլը: Այս մասին գրում է RIA Novosti-ն:
24-ժամյա բողոքի ակցիային մասնակցում է մոտ 20 հազար մարդ, որոնց շահերը ներկայացնում են 4 արհմիություններ: Նրանք մետրոպոլիտենի ղեկավարությունից պահանջում են վերանայել աշխատավարձի վճարման պայմանները՝ կապված սեպտեմբերի 12-ից հանգստյան օրերին մետրոյի շուրջօրյա աշխատանքի հետ:
Շատ մարդիկ չորեքշաբթի օրը աշխատանքից ավելի շուտ տուն գնալու թույլտվություն են խնդրել՝ մինչև գործադուլը տանը լինելու համար:
Ընդհանուր առմամբ, երեկոն առանց միջադեպերի է անցել՝ չնայած, ինչպես և սպասվում էր, մայրաքաղաքի փողոցներում և ճանապարհներին գոյացել են «խցանումներ»:
Այնուամենայնիվ, լոնդոնցիներին ծանր ժամեր են սպասվում հինգշաբթի օրը՝ առավոտյան պիկ ժամին: Մետրոն չի աշխատի մինչև հինգշաբթի երեկո, սակայն գործադուլի պաշտոնական ավարտից հետո էլ աշխատանքներն ամբողջությամբ չեն վերսկսվի: Մետրոյի աշխատանքի խափանումներ պետք է սպասել նաև ուրբաթ՝ օրվա առաջին կեսին:
Ըստ ամենայնի՝ գործադուլից շահել է բնակչության միայն մի խումբ՝ տաքսիստները. փողոցներում տաքսիների թիվը նկատելիորեն ավելացել է։
