«Ոչ թալանին» նախաձեռնող խմբի անդամ Վաղինակ Շուշանյանն երեկ Facebook-ի իր էջում կոչով դիմել էր պատգամավորներին. «Քանի որ ստեղծվել է մի իրավիճակ, որտեղ դուք, միևնույն է, ոչինչ չեք կարողանում փոխել, ազդել որոշումների վրա, ժամանակ առ ժամանակ անում եք քայլեր դիվիդենտներ շահելու համար, որոնք ի նպաստ հանրությանը չեն ծառայում, կոչ եմ անում հրապարակայնորեն՝ վայր դրեք ձեր մանդատները՝ թողնելով դաշտը նրանց, ովքեր ապօրինի, հակասոցիալական, հակամարդկային որոշումներ են կայացնում: Դրանով դուք կստեղծեք քաղաքական ճգնաժամ ` առաջին հերթին չլեգիտիմացնելով այդ որոշումներն ու որոշողներին»:
ԱԺ պատգամավորները այս օրերին գրեթե չեն պատասխանում զանգերի, կամ նրանց վարորդներն են խոսում իրենց փոխարեն: Մի մասը այս կոչին ծանոթ չէր, մյուս մասն ուղղակի չեն արձագանքում կոչին՝ նշելով, որ իրենք ամեն մեկի ասածը չեն մեկնաբանում:
ԱԺ ԲՀԿ խմբակցության պատգամավոր Միքայել Մելքումյանը «Առաջին լրատվական»-ի հետ զրույցում նշեց, որ մանդատը վայր դնելով որևէ հարց չի լուծվում, մանդատը վայր դնել՝ նշանակում է փախչել ռեալ պայքարի հարթակից. «Անձամբ ես՝ որպես պատգամավոր, կարողանում եմ իմ և իմ կուսակցության պայքարն այնպես ձևավորել, որ որոշակի դրական քայլեր են կատարվում՝ սկսած օրենքներից, վերջացրած տարբեր ծրագրային դրույթների կատարմամբ: Վայր դնենք, որ ինչ անենք, չհասկացա, լուծարվի՞ խորհրդարանը այս պահին, չեմ հասկանում»,- հավելեց նա:
«Ժառանգություն» խմբակցության քարտուղար Թևան Պողոսյանն էլ այսպես արձագանքեց. «Ամեն մարդ իր ձևով է տեսնում իր պայքարի շարունակությունը: Այս րոպեին նա այսպես է տեսել շարունակությունը, ուրիշ մարդիկ էլ գուցե այլ կերպ են տեսել: Ուրախ եմ՝ Վաղինակի կարծիքը լսեցինք, իմացանք:
Եթե պատգամավորներն իրենց մանդատները վայր դնեն և զրկվեն այն մնացած հնարավորություններից, որոնք կարող էին օգտագործել… Հիմա ո՞րն է լավ, որ մարդիկ կարողանան այնտեղ հարցը բարձրացնել, խնդիրների մասին բարձրաձայնել, նախաձեռնություններ իրականացնել, միգուցե շատ դժվարությամբ, շատ հաճախ հաջողությունների չհասնելով, այդ հնարավորությունն ունենա՞լ, թե՞ որևէ հնարավորություն չունենալ և որևէ բանով չզբաղվել»,- ասաց պատգամավորը:
Նա ասածը օրինակներով հիմնավորեց. «Եթե Արծվիկ Մինասյանը չլիներ պատգամավոր, կկարողանա՞ր պարտադիր կուտակայինի օրենքում այսքան փոփոխությունների հասնել, կամ եթե Նիկոլ Փաշինյանը չլիներ պատգամավոր, կկարողանա՞ր հասարակության հուզող բազմաթիվ հարցեր բարձրացնել, կամ եթե Էդմոն Մարուքյանը չլիներ պատգամավոր, կկարողանա՞ր Վանաձորի համար միգուցե շատ փոքրիկ, բայց շատ կարևոր խնդիրների լուծման հասնել: Այնպես որ, խնդիրները պետք է դիտարկել համակարգված, ոչ թե միայն մեկ խնդրի տեսանկյունից»: